美國911一周年安然度過，美股早升晚跌，但跌幅唔大。港股先跌後穩，恒指埋單有少少進帳。滙豐（005）收87.50元，升1格。911周年過去，少咗啲陰影，大市有望定住，然後由個別領導股支撐大局，滙豐係主角之一。
買啲滙豐Call輪，博正股上幾個價位帶動，搵多少飲茶錢。9395係正路對象，明年1月到期，現價46仙，溢價6.4%，槓桿率19倍。溢價唔算吸引，但有咁高嘅槓桿率同3個幾月壽命，都值得諗吓。𠵱家唔係食大茶飯嘅時候，博喺短時間之內，滙豐升1.5至2元，揸隻輪就有兩成左右嘅利潤落袋。
滙豐Call輪9325現價11仙，兩個月後到期，成交金額大過9395，但溢價高而壽命短，制唔過。
恒指升幅唔大，但綜合企業股普遍省鏡，中信（267）升2.6%，九倉（004）升2.2%，太A（019）升1.5%，和黃（013）升得0.5%。博和黃追番上去，諗些少和黃Call輪，對象係9516，明年3月到期，現價64仙，溢價6.7%，槓桿率8.2倍。
唔怕和黃3G業績睇唔通？短炒股票，唔使理得太多。
章 盛