港珠澳大橋引起嘅爭論，好睇過花燈，胡應湘vs霍建寧，算係勢均力敵。記得上星期六跑夜馬，碰到惡佬明，佢個地盤最近完工後，公司立即解散，於是惡佬明又試「放大假」，大把時間刨馬。建築行業就係咁，𠵱家幾難搵到一份穩定嘅長工。是日頭三場馬都係二號贏，左丁山與惡佬明都買唔中，第四場我哋唔敢唔要二號「愛蓮曲」，買重二、四、五，偏偏二號大敗，真真無癮，於是不如傾吓閒偈，講到條港珠澳大橋。
左丁山問：「建築界點睇？」惡佬明話：「私底下講我就認為不可行。淨係靠汽車流量喎，邊度信得過，起橋志在沛公，沛公就係大嶼山貨櫃碼頭。不過咁，建築工程界好需要工程，有儍仔肯出錢起橋，我哋一定公開贊成，冇工程師會反對嘅，最緊要我哋呢行有工做，財團蝕本咪由得佢囉，如果合和投資，你就唔好買合和股票喇。」
政府出錢起又如何？惡佬明話：「唔得，納稅人血汗錢點可以丟落鹹水海。不過你唔使驚住，董特首成日講環保，廖秀冬局長以前係環保顧問，靠講環保起家，如果呢個政府重有啲信用嘅話，起港珠澳大橋嘅EIA（環境影響評估）好難過到關，事關起橋工程一定趕絕中華白海豚，破壞現有海洋生態，港珠澳大橋與環境、運輸、工務都有相關，廖秀冬會頭痛足五年。」