安雅昨日透露在台出庭判勒戒後，眼見庭外有一架囚車等候便哭了出來。另她雖然十六歲開始在美國拍拖，但感情生活絕不隨便，亦很抗拒一夜情，加入娛樂圈時，有老闆要求和她上床，她亦斷然拒絕。
二十六歲的安雅在台灣發生服食搖頭丸事件，結果要在土城看守所勒戒十日，日前回港後，她開始投入新的工作，不過這件事令家人和朋友十分擔心，連遠在美國的爸爸和台灣的外婆亦來電慰問，安雅首次覺得在家人面前很丟臉。昨日她在嘉禾公司接受專訪時，更透露往看守所途中在車上哭了出來。
「由我去台灣出庭到勒戒，其實我一直都保持鎮定，只有當法官判我入看守所時，我見到已經有一部大車（囚車）喺度等緊，又唔畀我同傳媒交代番件事，唔知傳媒會點寫，想到呢度我就忍唔住喊，覺得自己好慘，不過後來我又怕俾人影到我喊嘅相，所以即刻抹乾啲眼淚。」
年半前安雅被嘉禾看中來港發展，但接二連三出現負面新聞，除了服食搖頭丸事件，之前又傳過她與台灣富商黃任中的緋聞，而最近又傳出與謝凱珊之弟謝凱健拍拖，但對於自己的感情事她顯得頗避忌。
「我唔容易同男人發生關係，雖然我嘅外表睇落好野，但實際並唔係咁，如果我真係咁隨便，啱啱入呢行時，有老細要求同我上床之後，可以全力捧紅我，當時我冇答應，因為可以同我發生關係嘅人，一定要係自己鍾意嘅人，唔可以攞嚟當交易咁，我好抗拒一夜情。
「不過喺香港娛樂圈發展咗年半，我始終唔係好適應，因為好似去到邊都會俾人影相，呢排我出街就有記者跟我，好多朋友怕見報都唔敢見我。」
在美國長大的安雅，在當地接受教育，思想很洋化，從小父親對她管教很嚴，可能因此培養出她的反叛性格。
「爸爸係比較傳統嘅中國男人，佢覺得女仔應該文靜啲，但我讀書時成日同男仔玩埋一齊，外形好男仔頭，心又野，所以阿爸就唔多鍾意我出街。直到我十八歲，可以自己住，感覺就好似重獲自由咁，當時我好鍾意聽音樂同去的土高，嗰陣會成日同朋友去跳舞，不過呢個瘋狂歲月已成過去，𠵱家入咗娛樂圈，當然希望可以做番啲成績，除咗拍戲外，我希望喺樂壇亦可以有一番作為。」
採訪：陳月媚
攝影：仇志德
服裝提供：DaDa（海港城）