兵工廠領隊雲格最近已經為韋拉被英足總控以行為不檢一事搞到好煩，點知班法國兵重係唔生性。好似周二阿仙奴贏曼城場波，隊長韋拉就好狼死咁踢到對手中場比高域斯，食咗件黃牌之餘，重夠膽死話人「插水」。
至於亨利入完波之後又揭起件衫顯示啲字句，雖然入面內容係慶祝某明星嘅BB出世，但始終算係知法犯法；搞到雲格賽後拿拿臨撐亨利，話規則係死，球員率性而為有時值得體諒㗎。亨利最後冇被追究，但雲格已一頭煙。
做領隊平時要諗計調兵遣將，球員犯事後又要同佢哋補鑊，真係做人領隊甚艱難囉。
前日慕尼黑打吡賽後，球證歐斯共出示八張黃牌，同埋趕咗拜仁助教軒基出場，拜仁教頭希斯菲特賽後就彈歐斯唔識控制比賽氣氛。我求大俠覺得最搞嘢係呢位球證趕軒基出場時，並唔係直接去後備席畀牌，而係叫拜仁隊長簡尼幫佢叫軒基離場。唔知係佢尊重軒基，定還是拜仁班友惡嘞。
意甲終於落實響禮拜六開波，有人問我求大俠點解幾間大球會肯蝕底貼錢幫細球會？查實幾間大球會不嬲賺多其他球隊好多，而再唔開波操狀態嘅話，會影響佢哋備戰歐洲賽㖭。另外，最近有調查指足球幫到大部份意大利夫婦調劑生活，所以今次終於如期開波，算皆大歡喜。
睇阿仙奴對曼城場直播真係令我求大俠好興奮，求大俠嘅立場好中立，並唔係因為邊隊贏而高興，而係因為見到曼城嘅中國後衞孫繼海竟然可以搞到世界級嘅亨利一戙都冇，多次作出極成功嘅攔截，真係應晒周杰倫首《雙截棍》嘅歌詞：「東亞病夫的招牌，已被我一腳踢開」，老孫好嘢！
「球神」米高佐敦雖然仍未落實來季嘅動向，但噚日巫師教練哥連斯就爆料，話佐敦將會喺佢對波鞋裝上嵌入物，希望可以減輕佢右膝嘅痛楚咁話。照呢個情況嚟睇，我求大俠相信佐敦為咗球會好呢個大前提，點都會玩埋嚟緊呢一季，最多咪中途引退囉！