罹患鼻咽癌的林女士，與兩名女兒近日獲房屋署分配公屋單位，將可搬離狹窄的居住環境。可是林女士自患病後失去工作能力，靠綜援金勉強維持家計，生活捉襟見肘，實無力應付搬遷的龐大支出。蘋果日報慈善基金即時撥款解困，並將安排轉送衣櫃、書枱及書架等物資。
容顏憔悴的林女士向到訪記者歎謂：「呢間屋計埋廚房、廁所，都只得百幾呎大，細到冇辦法間開廳同房，擺兩張碌架床、雜物櫃同摺枱之後，已經冇乜位，所以細女成日要坐喺床彎低身用個枕頭墊住嚟做功課，辛苦啲都冇辦法。」
林女士的長女早前畢業後，未能繼續升學，又一直難覓工作，成為時下數以萬計雙失青年的一分子；幼女阿欣剛升讀中三，學業成績一向彪炳。
「阿欣由細到大都好生性、好勤力讀書，攞唔少學業成績優異獎，前排喺中二升班試更加考到全級第一名，令我覺得好安慰。但個儍女見屋企環境唔好，就同我講想讀完中三之後暫時停學，唔使我負擔咁重之餘，佢又可以去打工幫補家計。我惟有叫佢最緊要讀好書，唔好擔心其他嘢。」林女士苦着臉說。
五十歲的林女士，丈夫早年患上精神病及糖尿病，無法繼續從事護衞工作，令家庭生活陷困。林女士原從事酒樓女工，近年她證實患鼻咽癌，經過兩次電療手術後，聲帶及說話能力大受影響，難以繼續工作，舉家靠綜援金勉強餬口。
「個病令我講嘢好辛苦、把聲變得好沙啞，經常要飲水，一日兩餐都要用水送飯。」林女士目前須定期到醫院覆診及定時服藥，以控制病情。
刻下，林女士更為缺錢搬遷終日憂心忡忡，「我哋平日食用好慳，多數蒸水蛋同煮菜做餸，每個月依然好手緊、難有錢剩，𠵱家我邊可能攞到幾千蚊出嚟搞搬屋！」
氣虛體弱的林女士續稱：「阿欣一向冇書枱溫習功課、冇書架擺書，另外屋企個衣櫃已經爛咗，我惟有諗辦法執啲舊家具用。」
按現行條例，社會福利署只會向領取綜援的長者及傷殘人士發放搬遷津貼，故林女士一家除每月獲發租金津貼後，不會獲得當局援助遷居。
蘋果日報慈善基金了解林女士一家苦況後，即時撥款八千元，助她支付搬屋費用，紓緩其經濟壓力，另將安排轉送讀者捐出的書枱、書架及衣櫃給她。
捐款編號﹕C0679
暖流熱線
電話：29908688
傳真：23702192
電郵：
網址：