劉德華的一名日本女癡情fans，前日凌晨在華仔寓所等候他時，與看更發生口角，並用膠櫈擲向大門鐵閘，最後看更要報警求助。華仔昨日到商台做錄音訪問時，對此事感到很無奈。
前日凌晨一名四十四歲日本癡情女fans原田美加興，在劉德華位於布力架街的寓所外等候偶像時，與在場看更發生口角，更用膠櫈擲向大門鐵閘，最後看更報警，由警察勸喻該女fans離去。
華仔昨日到商台做錄音訪問，他對此事說：「首先我希望自己嘅歌迷同影迷都畀番少少空間我，盡量唔好喺我屋企等，唔好影響到其他人。佢（原田美加興）去嘅時候，我都唔喺屋企。」
華仔透露該日本女fans已斷續等候他兩、三年之久，他說：「佢都試過截我架車，之前未有電閘時，又試過潛入我屋企天台，等到我返屋企就㩒鐘。不過唔止佢一個嘅，其實咁多年都有幾個fans係咁樣。」華仔說：「起初佢都冇行李㗎！後來就攞埋啲行李喺門口等，重同個看更講劉生返嚟我就會搬入去。」
問到華仔日後如何解決？他笑說：「點解決？唔通打佢咩！我唔會發脾氣，佢哋唔懂事，懂事嘅就唔會喺我門口等，惟有用耐性，唔理佢囉，唔係點呀？」華仔希望傳媒不要大肆報道，免得fans以為可以用這種途徑表達感覺。
採訪、攝影：胡比