馬時亨呢輪真係黑！報告話佢冇事，點知公眾同議員又唔收貨，係要佢公開道歉，但係又因道歉唔夠大方唔夠真誠被批，你話做問責局長幾難。
原來馬仔噚日重有慘情事唔好意思講畀人聽，就係俾立法會議員劉慧卿第二次飛起。事緣勤力嘅馬局長一上任就約咗Emily食晏，唔知係咪算拜地主啦，點知煲呔打尖，話要傾吓人口問題，叫Emily推咗馬仔嘅約會，於是兩人就再約咗喺噚日會面，地點係金鐘港麗BrasserieontheEighth。
今朝Emily喺沙田辦事處開職員會，到十一點九打算出發時，收到老公來電，話好快會掛八號風球，佢心諗掛八號波重點去食飯？於是打電話去馬仔辦公室，點知撞正電話網絡大塞車，打極都唔通，佢當時人在沙田，心諗馬仔會打畀佢。
Emily於是完全冇咗件事，到下午一點二十分，先收到馬仔留言，話自己喺餐廳。Emily想覆佢，手電又打唔通，最後查電話公司搵餐廳電話，透過侍應搵到馬仔，卿姐話下次一定請客喎，梗係啦，要人哋坐喺度儍等。
馬仔噚日食飯變咗食檸檬，道歉又變鬧劇，聽講馬仔俾人放飛機返辦公室重好好脾氣，猛話只係聯絡唔到，唔關Emily事嘅！
傳真︰2623-9278
電郵︰