舊年做咗基金愛股之一嘅建滔化工（148），無情情公布用成７億元，在國內投資水電廠。經紀黃話呢單交易，令好多基金經理唔安樂，因擔心會令公司負債急升。
較早前已經有外資行出報告，指建滔股價可能會跑輸大市。由於家陣建滔股價仍處於高位，在有錢賺嘅情況下，真係唔排除會有基金沽貨套現，短期可能會有沽壓。
建滔噚日復牌，大跌7.9%，收5.25元。如果唔係打風晏晝休市嘅話，恐怕跌幅唔止咁小。雖然現價相對早前高位8.70元已跌咗好多，但較52周低位3.175元，仍然高出唔少，下跌空間唔細。
不過，建滔除咗大股東外，有個大芬亦揸咗超過1成，只要佢重未轉view，建滔股價或者可以企穩，若連佢都唔happy，想沽貨嘅話，到時就真係低處未算低。
另外，正在招股嘅信佳（912），市場傳出隻股有高人出手相助，如果傳聞可靠嘅話，入飛應該可以賺番餐茶。
慕容小初