呢幾日突然有颱風襲港，不時颳起大風同大雨；但有人卻密鑼緊鼓，準備新Showroom嘅開張。亞Mark所講嘅係韓國現代汽車，皆因呢個周五佢哋會將現時位於灣仔嘅陳列室，移師到靠近銅鑼灣嘅新銀集團中心地下，同樣係告士打道汽車一條街，不過舖面卻正型得多，更易為行經嘅路人同汽車注視嘛！雖然不過係換舖，但佢哋亦有新車抵港到賀噃！之唔係重新打入香港市場嘅Sonata四門轎車囉！有唔少人話，家陣中型轎車市場競爭激烈，好難響汽車市場企穩，不過現今韓國車質量幾近跟日本車睇齊，加上售價有一定嘅吸引力，若然以代步為大前提的話，相信亦不難為車迷接受㗎！據知部Sonata仍以2.0公升偈作主打，輔以4前速自動波，標準版亦不過賣12萬9千8咋！你話有無吸引性呢？