同好多舖頭仔老闆傾開，原來對政府好多怨言，話政府只捉小商人錯處，卻唔打擊大鱷。以假信用卡為例，其實問題非常嚴重，除咗舖頭容易中招外，連𠵱家流行嘅上網買賣生意都好多港人中招，啲口靚仔經PayPal（美國網上最大型款項交收公司）收咗卡過數後以為冇問題，寄件貨去外地後，先收到PayPal通知張卡過唔到數，所以交易不成立，到時個口靚仔已蝕錢又蝕貨。小老闆話銀行只會保障大公司，好多個人名義開嘅細舖都唔會保，如果收到假卡就要自己填番數，做小老闆認真辛苦。
除咗假卡外，假銀紙問題都好大鑊，𠵱家好多旺角嘅舖頭都唔收早幾年獅子頭嘅一千蚊紙，因為國內啲偽鈔技術高超，批假一千蚊紙喺紫光燈下仍可見到水印，好容易「賴」嘢。最慘係老闆仔不知就裏去銀行入數時，被職員仔發現，即刻報警領功，老闆仔要跟阿Sir返差館落口供，被記者影埋相當賊辦。
後尾連一千蚊紙都唔收喇，點知十蚊餅又有大把假貨，旺角好多舖頭啲十蚊銀都係同小巴司機或機舖「唱」返嚟，點知原來收晒假嘢，去到銀行入數，超過十個十蚊銀係假嘢，又要跟阿Sir返去落口供，被記者又影一次相，做小老闆認真可憐。
主持人：大食Jack
八卦熱報：