距離中秋重有個零星期，應節嘅蔬菜亦開始上市，其中嘅菱角就只有中秋前後至搵到，如果你哋都好似我肥師奶鍾意食菱角應節，咁就最好趁剛上市入貨，一嚟因為菱角造期短，只有個零月，二嚟家陣較抵食，等到中秋分分鐘貴兩、三成不等。
菱角以堅硬、黑實及重手為佳。好多人問我菱角咁硬點食呀？我自細已食菱角，想知點食好容易，菱角外殼的確堅實，但只要將佢烚熟即可輕易將殼剝落，見到裏面嘅白色果仁就食得，好似食瓜子咁，粉粉哋又幾香，作為小食有益又健康。
$6-$7/斤
部份菜檔有售
風靡日本及香港嘅卡通人物哈姆太郎，有喺電視上見過嘅小朋友必定會認識佢，最近佢火速抵港，搖身一變成為棉花糖，喺盒裝、袋裝及長條扭紋包裝上都可以見到佢，實行帶畀小朋友們新驚喜。
哈姆太郎盒裝雜果味夾心棉花糖，附手挽繩以方便攜帶，盒內有草莓味、香橙味及黑加侖子三種不同口味嘅棉花糖，而每粒棉花糖都印有四款唔同嘅獨立包裝，隨盒更附送精美砌圖，有得食之餘兼可以考考智力。哈姆太郎袋裝棉花糖同樣內附四款唔同嘅獨立包裝棉花糖。
盒裝雜果味夾心棉花糖$14.9/200克
百佳及華潤超級市場有售
袋裝棉花糖$9.9/220克
華潤超級市場及萬寧有售
長條扭紋包裝棉花糖$4.9/40克
7-ELEVEN及TOYS'R'US有售