噚日上晝只係掛三號風球，一切商業活動如常舉行，積極部署推售深井碧堤半島嘅九龍倉，上晝開講解會，鴻運有超過一百名同事捧場。內容係講個盤資料，同聽取提問，等代理可以對個盤有多啲認識，唔使俾客問到口啞啞。發展商並派發樓盤基本資料。
鴻運就特別印咗150本「碧堤半島銷售天書」派發，重會再印多150本。又喺隔籬麗都花園設立「鴻運地產碧堤半島展覽中心」，除擺樓盤模型，重有資料介紹㖭，下個禮拜會正式運作。代理為做新樓盤生意，又出書又租場搞展覽，愈搞愈激。佢哋喺惡劣嘅環境下，仍然自強不息都係好事嚟嘅。睇嚟發展商可慳唔少宣傳費。
另外，鴻運就新地小欖愛琴海岸內購送出嘅歐寶汽車，今日喺福方車行尖沙嘴陳列室舉行抽獎儀式，屆時新地代理周國賢會做頒獎嘉賓。以示公平，鴻運要求嗰40幾個買家到場，若委託出席者要有委託書、臨時買賣合約同買家身份證副本。
噚日出乎意料掛八號風球，搞到好多預定嘅活動被迫取消，好似均來集團嘅半山寶雲道12C號豪宅，委託標售嘅第一太平戴維斯，原本安排招待傳媒實地睇樓，等大家感受吓物業嘅豪華氣派，點知就撞啱打風要改期。
而嘉里建設嘅大埔滌濤山兩個全新示範單位，原本今日開放畀記者睇，都要迴避改喺酒店開記者會，只可以透過發展商提供嘅相片，去想像物業究竟有幾豪嘞。
另外，長實執行董事趙國雄原本噚日下晝兩點搭機去上海，照睇都無法成行。
嘉華地產同宜家傢俬合作，喺沙田新城市中央廣場，搭建馬鞍山星濤灣示範單位「藍珊瑚」，開放以嚟共有八萬人次參觀。其間嘉華搵專人在現場做抽樣調查，結果有九成半受訪者都好鍾意星濤灣嘅位置，六成重話會喺未來半年計劃買樓，馬鞍山係首選。另外，搞嘅抽獎，今個禮拜日就截止，名額一百個，已經收到差唔多兩萬份表格。
中原地產周二搞「盛世25」慶祝活動揭幕禮，蘭西都有睇吓佢哋搞邊科。會場派發一本薄薄嘅「廿一世紀辭典」，裏面嘅鋪排學足中文字典解釋字詞嘅方式，但內容係講新地品牌好，新地樓質素高，都幾硬銷，打探之下，先知原來當日早上新地代理執行董事蘇仲強都有出席，講題係新地品牌。中原認真識做，聽講本中記牌字典，印咗幾千本。
發展商售樓部為求交到數，真係乜嘢手法都要用，有時重唔係咁正路㖭。業內人士指出，呢排就興以公眾內購方式引君入甕，買家喺羊群心態下，諗住優先揀樓有着數，不過喺冇價單嘅情況下，發展商就會睇反應開價，人多嘅就叫高啲，結果好多時呎價都貴過公開發售價，分分鐘做羊牯。從近排新盤內購場面墟冚情況嚟睇，證明發展商宣傳手法了得，又或者係代理嘅游說能力高。但若果次次係咁，遲吓啲新盤內購，重有冇買家肯入市就唔知嘞，狼來了嘅故事相信冇乜人未聽過啩。
發展商賣樓要吸引買家注意，除咗價平優惠多之外，還要搞好多活動同宣傳，好似香港興業就快賣嘅愉景灣海澄湖畔二段，嚟緊嘅禮拜六日，會喺現樓舉行「美好人生嘉年華」，內容有之前曾透露過嘅大抽獎，同兒童天才表演等，重有小朋友最鍾意嘅卡通人物巡遊、大人有興趣嘅風水命理攤位，務求令一家大細都開心滿意。當然，重有一定唔少得嘅美食天地啦！
發展商噚日登咗個廣告，話海澄湖畔有「十優驚奇」，包括學習、文化、空間、綠色、健康、玩樂、水陸、生態、升值同家居。究竟係咪真係有咁多驚奇，要親身去睇過至知，不過資料來源由客戶提供，咁至最驚奇。
蘭西
電郵地址：