噚日強烈熱帶風暴黑格比襲港，搞到要懸掛八號風球，市民一知道打風梗係即刻趕返屋企啦，馮仁昭當時正喺中環，點知就撞到陳啟泰（阿Ken），見佢匆匆咁上咗中環一幢商業大廈入面，原來佢入咗一間護理頭髮嘅中心。
阿Ken喺八號風球下去整頭髮，唔通佢怕大風會吹亂啲頭髮？嗰間頭髮護理中心又唔係普通髮型屋，唔通阿Ken有脫髮危機？
一個鐘頭後，阿Ken做完頭髮護理，馮仁昭問佢係咪有男性中年脫髮危機？佢就話：「梗係唔係啦，雖然我啲頭髮係比二十幾歲時少，同埋近排洗完頭後多咗甩髮嘅現象，不過呢啲都好正常，而且我又係藝人，儀容好重要，所以我咪去做頭髮護理，等啲頭髮健健康康咁生長。」
容錦昌日前俾周刊記者話佢喺銅鑼灣時代廣場七樓男廁偷窺，俾警察帶返警署，不過最後都冇事。噚日打八號風球，不過容錦昌依然有返去佢爸爸喺西環嘅順昌隆燦記油莊幫手，下午三點幾，見佢爸爸返舖頭，記者舉相機影相時，容錦昌喺舖頭閣樓伸個頭出嚟同佢爸爸講：「唔好理佢哋。」而佢爸爸就話：「我冇嘢要交代。」之後容錦昌就冒住大風雨走人。
有個歌手出道後冇乜人睇好，但偏偏佢去親公開場合，或者出席各大小表演活動，都有班fans舉晒牌為佢吶喊歡呼。而嗰個歌手每次見到有人咁擁戴佢，都唱到好投入，唱到最high時重會情不自禁拋嘢落台，或者將抹完汗嘅毛巾拋畀fans，然後班fans就會發狂咁搶。但其實每次活動完咗，歌手都會叫助手去搵番個fans攞番條毛巾同埋件衫，搞到連啲職業fans都話佢cheap。
城中名女人同富豪嘅戀情，呢兩年成日都被人報道，但原來最近個富豪同名女人已經分咗手。富豪本身好低調，更加唔鍾意身邊嘅女人高調，其實呢排名女人出嚟接受傳媒訪問時，就知佢同富豪嘅關係已經完咗。不過名女人本身係叻女一名，而且有富豪嘅名氣照住，名女人仍然好有佢嘅新聞價值，大把人畀面佢啦！
噚日八號風球，黃凱芹（Chris）冒住風雨喺海逸酒店舉行「黃凱芹LongTimeNoSee演唱會」記者會，佢下月十號會喺紅館開個唱，湯寶如同埋劉小慧已經答應做佢嘅表演嘉賓。阿Chris話噚日重收到一張幾萬蚊嘅支票，呢筆錢係唱片公司喺七年嚟推出佢嘅唱片，所收得嘅版權費同寫歌收入，佢打算用嚟幫補一吓演唱會嘅置裝費。而佢開完記招後重去到隔籬海旁畀記者影相。
高齡女藝人同男演員拍拖，佢哋喺人前表現到好似好恩愛咁，但外人就非常之唔睇好佢哋嘅戀情，因為佢哋呢一段，可以話係名副其實嘅「雞鴨戀」，高齡女藝人以前一直有出嚟撈，𠵱家就話上咗岸，而男演員未同女藝人一齊之前，更加係男女都啱，除咗服侍女人，畀多少少男人都照殺。
葉蒨文噚日喺八號風球下去咗廣播道商台接受訪問，而佢老公林子祥就喺九龍塘又一城行住街等佢做完訪問後接佢走，佢兩公婆都不知幾咁恩愛。
葉蒨文話睇到報道話劉德華有個癡情女fans喺門口等佢，其實葉蒨文自己以前都試過畀fans日等夜等，有次重因為個fans等得佢太耐，搞到唔高興，葉蒨文話真係俾個fans激死。