打風半日市，變化輕微，等待夜晚美股指示。
靜市中亦有啲窩輪勁升。例如排頭位嘅中遠Call輪9300係咁易成10萬份，就由8.1仙飛上11.9仙，升47%。呢件由一波發行嘅Call輪，啱啱先創新低，莊家出嚟頂幾手，就做咗阿一。正股（1199）收5.75元，升2.7%，當然對隻輪有啲用，但冇乜意思，因為隻輪都相當價外，唔好話到期之時隻輪重值唔值𠵱家個價有疑問，有冇得剩亦係大有疑問。9300行使價7.288元，11月杪夠鐘，正股距離行使價有1.54元，望正股兩個幾月內有咁嘅升幅，隻輪先至有得諗。
龍虎榜排第2位嘅係和黃Call輪9291，升幅3成，輪價由「冇得再跌」嘅1仙升上1.3仙，唔算齋升，有8球幾易手，有人掟成十皮嘢去發夢。
用到發夢咁嘅字眼，應該冇乜錯。9291得5個禮拜命，行使價63元。和黃（013）𠵱家只係52.25元，要喺咁短時間內升十幾塊錢，隻輪先至唔使作廢，你話和黃有咁嘅升幅嘅機會有幾大？用個幾仙去買夢，制唔過。和黃另1件Call輪9334，按盤價2仙，睇住嚟，好快變1仙。
章 盛