港股噚日雖反彈逾百點，不過成交仍不算活躍，只得51億元，恒指收報9885，升162點。Cookie話，市場主要憧憬美股可能在911一周年後強勁反彈，及聯儲局將作出減息行動，挽救經濟。
仙股除牌風波本身已經係一件國際笑話，噚日公布之調查報告更係笑話中之笑話。報告內認為證監會主席沈聯濤毋須負上責任，其中一個理由係因為言語不通，而且財政司司長梁錦松亦照單全收，接受報告內容及建議，即接受語言不通為脫罪理由。仙股風波事件真係唔查好過查，愈查愈醜，免得損害香港國際金融地位之形象。
噚日龍發製藥（2898）開始發威，勁升8%，以0.405元收市，成交弱咗少少，但都有近千萬元成交。黑客話，幕後人士已收集得七七八八，不過暫時重未係時候開車，因為整體大市氣氛仍差，幕後手頭又唔等錢使，水頭依然充足，可以慢慢玩多陣，等候機會。
龍發除咗以「排毒美顏寶」出名外，最近又推出「補氣養血寶」，由於公眾對中藥保健意識日益提高，加上龍發有一定知名度，所以有芬佬睇好其前景。另一隻名牌中藥保健股位元堂（897）表現亦佳，股價勁升10.5%，收4.2仙。
周正毅喺周一減持5.6%上海地產（067）股權，每股作價0.82元，同佢一致行動嘅人士仍需在1個月內減持多6.8%，暫時此股會於0.85至0.90元水平上落，直至完全回復公眾持股量在25%以上之後，隻股先至有機會發圍。黑客話，最近好難搵人安排配售，所以呢類公司要回復公眾持股量在25%以上，真係愈來愈難。
阿虎