長實馬鞍山酒店海澄軒落成，開始招租，商場要指定行業至租得。長實最新一期刊物顯示，海澄軒套房最細623呎，標準單位677呎，兩房兩廳至三房兩廳，月租六千八百元起。唔收按金，租期又可自由選擇。發展商喺馬鞍山廣場整咗個示範套房。
至於商場部份，最近有一家酒樓，以月租十二萬承租近1.25萬呎，呎租唔使十蚊。
間酒店地皮曾鬧到滿城風雨，政府喺97年底推出招標，98年3月公布結果，由長實以一億二投得，每方呎樓面地價只係二百蚊，俾人狂抦，話係官商勾結。
蘭西最近睇政府公布嘅資料，酒店嘅建築成本係6.32億，即每方呎千一蚊有找。假如計埋利息等支出，每呎總成本應該都係千五六蚊，總成本應該唔使十億。
若果全部租出，回報率應該都有約八厘，比起一般酒店和味得多。不過當日以超低價投地，都係得咁嘅回報，又似乎少咗啲喎！
小欖愛琴海岸前晚內購，首名透過鴻運買樓嘅幸運兒，即場獲發展商送出一個車位。鴻運新界區高級區域經理劉志傑話，買家籌號係10號以內，現居元朗，用280萬買入3座10樓E單位，面積1041方呎。
劉生重話，送畀內購買家嘅歐寶全新型號Corsa房車，好快會抽獎，有40幾個客爭呢部車，即係話鴻運做到40幾個內購。
近期樓市氣氛好番好多，大家都以為地產代理唔使咁慘，但聽講大行每名經紀每月要做到三萬蚊佣，公司先至打和唔使蝕。不過好多根本達唔到呢個要求，炒晒佢哋又唔掂，最後惟有降低要求到每月做一萬蚊佣，但實情重有好多經紀食白果開唔到單。
𠵱家新入行嘅代理底薪約五千蚊，若做到生意會同公司拆佣，但公司就要提供埋裝備畀佢，又要出錢做宣傳，所以市況一逆轉，老細就好頭痛。
內地沿海人民生活富庶，但內陸或山區就好窮，番禺祈福新邨早前發起全邨居民、職員同學生捐款運動，籌到50萬，用喺廣西山區百色，起間百色祈福新邨小學，今個月1號重舉行剪綵儀式。以後啲小學生就唔使喺幢危樓度上堂嘞。
另外，中記為鼓勵同事多做善事，搞個好多香港人都鍾意嘅麻雀比賽籌款活動，捐助健康快車，用於醫治內地偏遠地區白內障患者。
今次嘅雀局，預計100圍，每人最少要捐500蚊，一圍枱嘅兩千蚊捐款，啱啱可以幫到一個白內障患者重見光明。勝出嘅麻雀王會得到獎盃同一萬蚊獎金。
蘭西
電郵地址：