德叔，是一名超級馬迷，但不是那些踎在街邊，一邊叼着香煙，一邊看賽馬貼士的馬迷。為了要日對夜對深愛的馬匹，他放棄了做警察這份鐵飯碗工作，用全副身家買下深圳一個馬場，飼養了二百多匹本地馬。他本想把香港的賽馬文化帶到內地去，可惜成立賽馬會這個計劃最後胎死腹中。不過他說永不言悔，只要還有經濟能力，他都會堅持與馬為伴，義無反顧。
記者：曾順珍 攝影：林栢鈞
早上六時，當很多人還在夢鄉的時候，德叔已起床到馬場工作，因為他是深圳西麗湖騎術培訓中心的場主，要到場打點一切，如訓練馬匹、準備飼料、修理馬鞍、剪毛等。現時他的馬場擁有200多匹馬，可說是私人馬場中數目最多的。
「我十歲就開始騎馬，因為當時好多東南亞運嚟嘅馬匹都會送去羅湖軍營飼養，而我阿爸又喺英國國防香港軍需部工作，所以我經常去軍營騎馬，教練重係鬼佬騎兵㖭。不過阿爸退休後，我就要去沙田白鶴汀騎，每次大約要二、三十蚊，嗰時食一個早餐都只係斗零。」
直到德叔出來社會做事，選擇了好喜歡的警務工作，但為了騎馬，他寧願放棄這個從小要當警察的志願。
「85年，我30幾歲，我喺阿媽鄉下深圳白芒村度養咗4匹馬，全部都係新疆、蒙古同澳門退役馬，因為名種馬太貴我買唔起。由於做警務人員申請回鄉比較麻煩，一年只可以返鄉下4次，所以我決定辭工，咁就可以日日騎馬。」87年，德叔終於如願用5萬多人民幣租下現有50萬平方呎的西麗湖馬場，再用30萬買了50匹本地馬，還僱用了一批退役解放軍的騾馬隊，負責打理馬匹，總投資達200萬。就這樣，開始了經營馬場。
德叔承認最初開馬場，他對養馬毫無認識。
「我唔識養馬㗎，但我會睇有關書籍，又會邀請長春解放軍獸醫大學嘅徐英泉教授，教我養馬心得，重有一個由蒙古嚟嘅祝教授，專門教我哋有關配種同飼養知識。」
除了內地教授，德叔還會邀請香港的專家上大陸傳授養馬秘訣。「簡Sir(簡炳墀)係我嘅顧問，佢教我點樣養肥啲馬，佢話最緊要係食得好，所以飼料一定要最好。另外，我又搵咗告東尼嘅師傅謝丁有，教我嘅員工點樣操練馬匹，因為我都想自己嘅馬可以最佳狀態見人。」
現在，德叔的馬場大約飼養了200多匹馬，主要是供遊客策騎，或賣給馬主，以前法例還未收緊時，德叔會操練馬匹上陣參賽贏獎金，甚至曾經想過要搞個賽馬會。
「89年我已開始搞越野賽，當時全中國重未有正式賽馬活動，可以話係我將香港賽馬文化帶嚟內地，後來廣州、東莞同深圳先至陸續搞賽馬活動。我操嘅馬好Fit㗎，成日都跑贏，98年喺東莞嗰次重試過跑8場贏7場㖭。我又訓練過好多內地冠軍騎師，例如鞏紀嶺、鞏紀峰咁。」
93年，德叔以為有機會在大陸搞賽馬會，甚至有人主動找他合作。「當時我哋喺福建東山島租咗塊地，重周圍去揀馬，而我就負責訓練馬匹同策劃賽事，原本係想辦一個好似澳門賽馬會咁嘅規模，但後來至發現喺大陸根本唔可以辦賽馬會。」
不過，德叔並未因這次失敗而放棄，現在他還跟香港馬會聯絡，希望可以把自己的馬場，作為馬會在深圳的檢疫站。「呢條可以話係不歸路，以前97年好景時，每個月都賺幾萬蚊，𠵱家就僅僅夠，但只要我一日重有能力，我都會支撐落去。如果你問我點解鍾意馬，我只可以話凡喜歡速度感嘅人都會愛馬。連周恩來也曾因騎馬跌斷手，以前共產黨都有自己嘅馬球隊啦……」
一講到馬，德叔就有說不完的話題，「蒙古馬本來係細種馬，但近年因為同俄羅斯嘅頓河馬配種，所以變得大隻，而呢種頓河馬戰績彪炳，喺史太林時代，俄羅斯就用了6萬匹頓河馬到歐洲打仗，戰事結束時只死了6隻。」
德叔話自己係個標準馬癡，因為他不但愛馬，就連一切跟馬有關的東西，他都愛收藏。
「幾年前我喺一個安徽農村嘅朋友家中，見到一輛清朝遺留落嚟嘅馬車，鍾意到不得了。馬車係以前用嚟畀小姐們坐嘅，因為朋友嘅家族，喺清代時係有錢門第，架馬車亦係祖先留低，我求咗佢好多次先肯用三萬蚊讓畀我。
「重有古時嘅人將騎馬作為一種消閒活動，尤其係蒙古人，佢哋發明咗一種可以摺叠嘅櫈，騎完馬，就可以坐下來悠閒地吹笛作樂，我呢張清代摺櫈係經過改良，我用咗2萬蚊從新疆附近嘅地方買返嚟。」
雖然德叔對馬如癡如醉，但也帶幾分現實。
「我曾經養過一隻幫我贏過好多場賽事嘅頓河馬，因為出賽太多終於跑跛咗，醫生證實無得醫。但每日佢依然定時定候用頭撞辦公室個窗，搵我攞紅蘿蔔食，我見佢行路跛跛吓，好唔忍心，於是將佢人道毀滅，當時我個女喊住話我殘忍。不過我覺得馬嘅能力係喺奔跑上，呢啲係自然規律，同愛護動物無關，佢死咗我個心都唔舒服。」
問德叔多年來有無一匹他最喜歡的馬？他這樣回答：「匹匹馬我都鍾意，無分彼此，但如果有馬主喜歡，我都會照賣，而且馬主會好悉心照顧佢，尤其係靚馬，唔應該留喺度咁浪費。」
雖然丈夫是一個馬癡，但太太卻完全不懂騎馬，皆因她畏高，但對德叔的興趣並無異議，反而全力支持。「佢開馬場時好多朋友話會蝕，但我覺得唔怕，反正係佢嘅興趣；不過做呢行苦多於樂，因為成日要擔心天氣，怕太熱遊客唔嚟，落雨天就更加無客。」
至於囡囡Isabel則認為爸爸在大陸開馬場是好事：「佢開馬場時我只係讀小六，所以都唔知佢哋做乜，只係覺得喺香港無阿爸阿媽喺度管住，我同阿哥可以日日打機，幾開心啊！」
姓名：楊松德
年齡：53歲
1973?6 任職警務人員
1987 深圳開馬場
1990 籌備搞馬會
1990 皇村馬場廣東馬王賽冠軍
1991 深圳馬會馬王大賽冠軍
1994 為華南水災籌款的慈善馬王大賽冠軍