中國珠海國際賽車場，可算係近期不少香港車迷新興嘅賽車地方，只需付出萬多元便可於賽車場玩兩、三天TrackDay；不過，有好多車主發現自己嘅座駕喺賽車場上，永遠發揮唔到應有嘅表現，尤以歐洲車為甚。有見及此，今日我哋就請來本港歐洲車改裝專家Tony，同大家講解吓落場比賽前嘅準備心得。
記者、攝影：黃凱穎
鳴謝：TWAutosport（21420001）
喺今次嘅講解中，我哋特別搵嚟三部頂尖歐洲車作示範，分別係林寶堅尼Diablo、奧迪A41.8TQuattro同蓮花Elise；呢三部車平日在街上行駛，並無作出任何用於賽車上嘅調校。今次到達珠海賽車場，第一時間就係要將部車嘅溫度降低；Tony解釋因為賽車不但要快，最重要係有持久力去完成整個賽事，參加呢類TrackDay亦係一樣，喺兩、三日嘅賽程當中，亦要確保車子本身沒有出現問題才可完成整個比賽，所以降低車子嘅溫度，可算係落場比賽前嘅首要工作。
另外，引擎室亦內加有不少導風喉同隔熱布帶，因引擎室內嘅熱力能令燃料系統容易因溫度升高而出現「氣阻」現象，致使油路供油不足或中斷供油，所以要用隔熱布帶將油泵與排氣管隔開；同時由於溫度高，車上嘅電線同電路都會用隔熱布帶包住；另外有唔少跑車喺TrackDay中壞車，都係因為電路嘅膠溶咗而引致短路。導風喉則可導入大量新鮮空氣，除能保持引擎室嘅溫度於合適狀況外，同時亦可提高吸氣系統嘅效率㗎！
至於引擎方面，其中一部Elise就加裝有一套水冷式油冷系統，以保持引擎溫度在最佳狀態；因為汽車引擎散熱除靠冷卻系統外，機油亦係一個重要角色，因為機油會流經引擎各部份，可帶走機件因摩擦而產生嘅熱力，而距離冷卻系統較遠嘅活塞部份，都可以經由機油獲得冷卻效果，所以油冷系統便可發揮最大功效。不過，油冷系統就有好多種，由於Elise嘅引擎設於中間，好難發揮風冷式油冷系統嘅效能，所以裝上水冷式油冷統系會較好，因為佢係透過水箱回水來冷卻，無論快車同慢車都有良好嘅效果。
Tony表示以珠海賽車場嚟講，散熱係一個好大嘅問題，因為賽道急彎多兼直路少，所以非常講求引擎及制動系統嘅耐用同散熱能力；就以制動系統為例，筆者見到好多三菱LancerEvolution等高性能跑車，都出現制動過熱嘅情況。Tony解釋因大部份當街車售賣嘅跑車，雖然用上Brembo高性能煞車碟作標準裝備，但由於煞車碟唔係Brembo用作賽車用嘅產品，故此經過一輪激烈比賽後，便會出現過熱嘅情況。
就以呢三部用作示範嘅歐洲跑車為例，佢哋都改換上高溫迫力皮，其中一部Elise重換上LotusSport嘅Racing煞車碟㖭，喺三日嘅TrackDay中亦無出現過熱或「腳軟」嘅情況。
同時，迫力油亦會換上低膨脹性嘅製品，呢類迫力油嘅沸點較高兼不易膨脹，從而令制動腳踏唔會有愈踩愈深嘅情況出現。
喺Tony嘅改車心得中，最重要係馬力同車重嘅平衡性，就算將部車改到有500至600匹馬力輸出，但如果無良好嘅平衡性，根本發揮唔到引擎同車架嘅性能；因為改動引擎時，好多時會令車重提高，所以就算加多100匹輸出，但車重相對增加20至30kg，咁樣其實就同原裝車無多大分別，而且重可能會影響操控性㖭。
另外當改動引擎增加馬力輸出時，亦同時會產生更多嘅熱量；因為當引擎中缸溫度增高，電腦會噴多一點電油作冷卻之用，而且重會將點火時間推後，導致引擎輸出無力，相反令引擎長期處於太低嘅溫度，因而會增加耗油量同發揮唔到引擎應有嘅輸出，所以改裝冷卻系統又係另一個重點所在。
由於香港沒有正式嘅賽車場，而且在街上胡亂飛車屬違法及危險行為，故此鄰近本港嘅珠海賽車場便成為不少車迷嘗試賽車嘅好地方；一般嚟講，到珠海參加TrackDay並唔需要有特別或熟練嘅賽車技術，因為大會係主要讓大家喺賽車場上試試賽車嘅滋味，而並非真正嘅賽事，同場重會有資深嘅車手同大家交流一下心得㖭。
如果大家想參加呢類TrackDay，可加入各大車會或嘗試與佢哋聯絡，睇睇佢哋最近會否舉辦TrackDay，若有的話可報名參加，而費用則大約為萬餘元起。