近排長城數碼（689）同TCL（1070）在惠州搞咗個合營企業，令到長城數碼股價有多少波動，吸引部份炒家上車。
不過經紀陳話，聽聞隻股財務上仍有多少問題要解決，稍後公布全年業績會透露，所以唔值得憧憬。
長城數碼股價早排一度跌到落1仙淨沽嘅慘況，但自從與TCL合作消息在國內廣泛流傳後，一度升番上去最高1.6仙，噚日平收1.4仙。
經紀陳話佢周圍問過，長城數碼同TCL呢單合作，其實某程度上，可以當成後者兼併咗前者嘅廠房，因為大陸彩電減價戰，唔係間間公司都頂得順。理論上呢單合作，對長城數碼可以叫做係好事。事實上，國內家電企業搞合併，將會係潮流。
長城數碼較早前搞過一次供股，集資高達6千幾萬元，好似全數用嚟還債，但聽聞仍然未夠，因此在前途未明嘅情況底下，隻股都係無謂立亂掂。
慕容小初