昨日三位落選港姐鐘子淇、關伊彤及保采芬飛抵泰國，與兩位港姐左慧琪及蔡潔雯會合，一同穿上泳衣為無綫拍攝「明珠大使選舉」宣傳片，三位落選港姐可能久疏戰陣，身形發福了不少。 記者卓寶花泰國直擊
無綫為配合「明珠大使選舉」活動，昨日三位落選港姐鐘子淇、關伊彤及保采芬，一同到泰國會合正身處當地作親善探訪的左慧琪及蔡潔雯，拍攝一系列宣傳片。
五位港姐均要穿上泳衣騎水上電單車拍攝宣傳片，而三位落選港姐，特別是保采芬的身形比參賽時明顯發福了不少，她說：「我都唔係好想着泳衣，因為我以為落選之後唔使再着，加上我近來食嘢時又放鬆咗，所以咪肥咗囉，不過公司安排就冇辦法啦。」
最近有傳左慧琪將出任明珠大使，故無綫有動員落選港姐為左慧琪造勢之嫌。問左慧琪對此事的看法，她說：「我好開心可以見番一班好朋友，我唔覺得TVB係幫我造勢，而且一大班人做宣傳個反應可以大啲。由於個親善探訪有人贊助，如果我哋突然返香港就會影響晒成個進度，其實我覺得每個人機會都好大，而我自己嘅中文就唔係咁好。」
對此保采芬說：「我唔認為我哋係嚟做陪襯，嚟泰國拍宣傳片好過留喺香港呀，起碼都叫做去過外國呀。我自己都睇好左慧琪，但係我都好有信心，因為我中英文都OK㗎。」
至於落選港姐關伊彤則表示不介意以泳裝示人，她說：「着泳衣都係要配合番陽光與海灘啫，另外我都唔覺得係做陪襯，今次嚟泰國當去旅行，兼且又可以同一班好朋友聚一聚，而明珠大使一職我都係睇好左慧琪。」