以指數計，好友冇贏，淡友冇輸，恒指微升2點，股民都喺度等緊911周年來臨，美股點走。油價升破今年高位，見去年5月以來新高。油股養眼，中海油（883）最威，收10.90元，進帳35仙；中石油（857）收1.63元，爬高2仙；中石化（386）收1.23元，升3仙。
中海油Call輪生猛，9275同9175升15%，9511亦升14%。如果要追中海油Call輪，最靚對象係9175，現價2.50元，有少少負溢價。問題係，正股近來升幅唔細，油價上升嘅因素已經反映咗七七八八，美伊一旦開火，油價可能反高潮獲利回吐，對油股、油輪都不利。
如果覺得油價唔會大散，搵油輪炒，中石油Call輪9361嘅吸引力反為最大。隻輪現價16.7仙，溢價3.5%，槓桿率9.8倍，明年6月到期，大把時間，交投亦唔算太冷，要逃亡都唔難。
威水輪中有隻日經指數Call輪9219，升27%，日股升番帶起隻指數Call輪。今年3月，日本年結，當月指數炒高，如今9月，係佢哋嘅半年結，跌得咁殘，可望有技術性反彈，亦可望政府出手救市，細細注賭日股回升買啲9219都諗得吓。只不過交投太疏，買賣價拉得太闊。
章 盛