明晚係911事件1周年，跟住913係黑色星期五，呢個禮拜煞氣相當重，唔怪得個個都唔敢輕舉妄動，港股噚日死水一潭，成交只有37億元，恒指反覆回升2點，收9723。
恒指噚日連5日線（現處9756）亦升唔穿，令人失望。好友動態相當消極，似乎只求保住長期升軌支持（現處9580水平）已心足。睇番噚日沽空成交有2.1億元，淡友相對積極得多，正部署攻勢，等待消息出擊。
噚日沽空最大順序係中移動（941）、滙豐（005）、新地（016）、和黃（013）及中海油（883），5隻已佔沽空總成交額64%，除咗和黃外，其他4隻股價都係上升，其中以中海油技術走勢最好，噚日9RSI及股價均升破短期降軌。
中海油短期走勢主要受期油升跌影響，形勢上美伊可能爆發戰爭，對油價有利。單從技術走勢分析，中海油昨重上20日線（現處10.85元）之上收市，報10.90元。若短期守穩50日線10.60元支持，將反覆上試11.30元至11.80元阻力。短炒可以10.60元作止蝕位，以11.30元為首個目標，升不破先行沽貨獲利，破位則以11.80作目標，到價套利。
不過若其他中東產油國對伊拉克支持只限於口頭，並無減少石油產量，甚至佔取埋伊拉克份額，則油價未必持續上升。此外，亦不妨留意中海油沽空是否持續偏高，若有這種迹象，因美伊將開戰而追炒中海油者要小心。
趙飛雲