老師近年要接受好多再培訓：中英文基準試唔及格要再進修，以前從未掂過嘅高科技又要惡補，𠵱家可能連搞國慶活動都要去學！
就快到國慶，教聯搞咗個調查，於266間中小學幼稚園中，八成學校都會於十．一當日，升國旗或者唱國歌，不過亦有23間學校認為學生冇必要喺校內慶祝國慶，多數學校亦冇計劃搞其他活動慶祝。
見到咁嘅結果，一向較為親中嘅教聯當然唔滿意，認為呢個情況要改善吓。由於好多學校表示，唔搞活動係因為校內冇人熟悉國慶應該點做，教聯因此提議，教統局應該培訓吓教師舉辦國慶活動，更向教統局局長李國章提議，花數百萬成立一個學生國民教育活動中心，「使每一個學童能以做中國人為榮。」雖然愛國教育全世界都係咁搞，連美國英國都唔例外，但香港𠵱家正要閂水喉，以「愛國」之名，可唔可以喺政府荷包挖到幾百萬呢？
傳真︰2623-9278
電郵︰