噚日講過,和黃大班霍建寧星期日打完高爾夫球,下晝四點半都要趕返和記大廈總部開記者會,高調反擊胡應湘;跟住八方就收到高人報料,話當日上午喺東莞個高爾夫球場,見到霍大班同財爺梁錦松一齊打波,伏明霞都有一齊玩。唔知佢哋揮桿之餘,有冇傾到最叻畫地圖嘅胡應湘呢?
其實一齊打波好平常,霍大班乃至誠哥同阿松不嬲都係波友,唔好係唔係都話人官商勾結。八方知道阿松上次同佢哋打波,重叫人以香港整體利益去睇港珠澳大橋㖭。
至於阿松名下幢東莞別墅,正係位於和黃喺東莞個海逸豪庭,屋苑旁邊海逸高球場,呢個場多數係業主同會員玩,閒雜人等一概不歡迎,私隱度夠晒高,所以最適合阿松同松嫂呢類貴人。
傳真︰2623-9278
電郵︰