收到一打讀者電郵，除咗要左丁山就中大迎新營事件表態之外，其他好多與學業前途有關，可知香港年輕人實在唔夠詢問渠道（否則嘅話，點解要問左丁山？）
女讀者Eva駐紮上海，問：「喺上海可以邊度買到《戰國策月刊》？」應該買唔到啩，除非發行大哥萬事德有通天本領，讀者Eva最好訂閱，由香港寄上去，請去函：「香港皇后大道中287-289號永傑中心302室戰國策商業月刊」，內地平郵訂費每年四百元，電郵：[email protected]電話：2851-3281找陸錦榮。
Eva去咗上海，唔想回流香港，既然你問到，左丁山以為你唸嘅三個選擇之中，第二個（即係在上海讀MBA，最好就係復旦加港大、復旦加中大、復旦加美國大學之類嘅課程），唔需要離開上海，可以一邊讀一邊繼續工作，橫掂你還年輕，唔好拍拖住，專心讀完先至講。如果喺上海讀法律碩士，半途出家，做唔成律師，正是唔湯唔水，冇乜用。走返去美國讀MBA喎，目前經濟唔好，風險甚高。
另一位女讀者問「𠵱家入行做financialconsultant重有冇得做？」唔知你講邊種？如果話係考完CFP喺銀行做理財產品嘅，應該有嘅；如果話做股票經紀、保險經紀，就要睇吓你啲性格是否合適，不可一概而論！