列斯「辣椒仔」阿倫史密夫呢排「當正老行」，上個禮拜六重幫英格蘭頂破葡萄牙大門；近日又大大聲咁同前隊友李奧費迪南講，叫佢呢個禮拜六曼聯作客列斯時要小心，因為佢唔敢擔保列斯球迷會點樣對李奧咁話喎。
其實「辣椒仔」咁樣講，令我求大俠諗到佢只不過同自己鋪路，因為佢呢啲有恐嚇成份嘅說話，明顯係要影響李奧，令自己可以喺前線攞到甜頭。老實講，「辣椒仔」今次亦都好大細超啫，因為佢直情唔提禮拜三列斯作客紐卡素場波，唔通佢當紐卡素冇到，話晒紐卡素都有斤両㗎。
范志毅嘅英國搵食之路好可能衰收尾，因為佢同蘇超鄧地嘅新合約傾唔埋欄，鄧地已經唔畀人工佢，最慘嘅係英國傳媒《BBC》都幫埋鄧地，話范大將軍背棄鄧地；另一份報紙又話佢以自由身走梗，所以范志毅雖然已經向足總上訴，但我求大俠相信，范志毅今次離開英國只係時間問題。
巴西攞咗世界盃冠軍後，再冇乜人提老將羅馬里奧，但佢周日又為富林明斯入波，令佢嘅巴西國內聯賽入球累積到一百球；同一日另一老將艾蒙度亦喺日本𡁻兩粒，令東京日視贏波；話時話，佢兩位老人家點入波都冇乜用，因為佢兩個踢緊嘅聯賽都係低層次啲，叻到識飛都冇用，相信巴西隊唔會再吼佢哋。