港島甲級寫字樓租金向下，租客搵寫字樓大原則係租金開支細過以前。不過，屋之島物業顧問行董事總經理黃志強（Graham）話，佢哋今個月會「細屋搬大屋」，將總部由衡怡大廈搬去怡和大廈。租用面積由五千幾呎，擴大到近九千呎，多咗近八成，所以租金支出就比以前多啲。
Graham話搬大屋係要大事擴充，已經請多咗三十個大學生，準備加強甲級寫字樓租務代理，有意連上環同西環嘅優質乙級商廈租務都做埋，另外當然唔會放過佢哋強項之一嘅豪宅啦。現時屋之島有一百二十名員工。
聽Graham講，個新總部前後傾咗三至四個月。佢哋都幾信風水㗎，事前請過前老細孫漢明嘅老友嚟睇過風水。當然，地方大咗，重有全海景，梗正啦！做嘢醒神啲，自然風生水起。
今日係政府賣地兼「911事件」一周年前夕，所以發展商與代理行都唔想點搞發布會，但也有例外。新地上晝會宣布，小欖愛琴海岸新優惠；中原就專登揀今日早上，為其25周年連串慶祝活動搞開幕儀式。睇佢哋嘅安排，都係避免同賣地撞時間，若果唔係，想有記者去都幾難。
近排頻頻見有食肆執笠嘅新聞，但其實新開業嘅都唔少，聽講最近尖沙嘴區就有5項租務個案，全部都係食肆。其中美麗華廣場地庫近萬九呎，就由一家日本餐廳以月租五十萬租咗，呎租約二十七蚊。
蘭西問康業物業李泳詩點睇尖沙嘴舖位市道，佢話因其他地區都有新商場落成，所以尖沙嘴區嘅零售市道近一年唔係咁活躍。但飲食業就重有支持，不過租金都要平啲至得。
聽日係「911事件」一周年，仲量聯行為此向該行五十家最大型企業客戶作出調查。結果班大客話，最着重大廈有冇加強保安同安全措施，入口重係最關注嘅地方，再唔同以前淨係睇大堂設計點豪華。有57%被訪者將入口通道保安列為首選事項。
另外，近85%公司對大廈管理如何準備緊急疏散計劃，列為三大優先考慮範圍。至於租用成本，有58%被訪公司表示有因「911事件」影響而增加了，當中有46%多咗1至3%。
新世界持有嘅上環信德中心招商局大廈（東翼）二十三樓，早前傳出易手，噚日土地註冊處出咗登記，成交價7440萬。以該層樓面23122呎計，呎價3218蚊。買家係營利建築工程有限公司，嘩！𠵱家建築業市道咁差，重有建築公司咁有米去買寫字樓。蘭西於是查吓公司註冊處，發現間公司原來係由香港興業持有，董事有大家熟識嘅何柏貞、鍾心田同埋陳子明。
蘭西睇番香港興業嘅年報，佢哋名下收租嘅寫字樓唔多，但係賣嘅就有北角道8號，今年5月以6000萬賣咗。今次買番層寫字樓，唔知自用定收租呢？
蘭西
電郵地址：