港股噚日繼續牛皮,成交只得37.6億元,靜到不得了,恒指收報9723,升2點。稍後中國電信上市集資25至35億美元;渣打又話集資至少3億美元;而盈富(2800)至少都要集資40億元,即係話大市至少要被抽水258億元,以噚日成交額計,足足相當於港股7日成交額,除非有新錢流入,否則大市將被抽乾水而下挫,其中以兩間國內電訊股壓力最大。
明晚就係911事件一周年,近期航空股已累積不小跌幅,國泰(293)噚日再跌3.7%,收10.35元,南航(1055)跌1.19%。市場除咗憂慮再出現恐怖襲擊外,亦擔心英美攻打伊拉克會刺激油價急升,不過國泰在對沖期油方面素有經驗,而且戰事估計不會拖長,據聞有基金準備伺機吸納。
華富國際(952)早前啱啱供完股,跟手又話要併股,每50股併為1股,併完股之後,每股面值仍為1仙不變,睇個勢公司似乎為下次抽水鋪路,唔通公司想轉型做抽水機器?公司早前5供3,發行20億股,每股1.5仙,集資3000萬元左右,集資所得只用作營運資金,並無新搞作,旗下網站業務前景一般,其他業務亦不見得吸引。股民聽見話要併股,股價即刻腳軟,一度跌至1仙。
德發國際(928)經過一輪調整後,最近請證券界北上睇時裝表演,趁機推介公司前景。據聞當中有部份中小型基金,睇好隻股發展潛力,好似有意想入股。德發噚日急升14.6%,收報0.51元,喺咁靜嘅市況中,成交竟達1455萬元。黑客話,呢一鋪相信有料到,有貨可以繼續持貨,睇多一陣至沽,短線甚至可以沽完再追。
阿 虎