雷諾車廠最近正式公布咗關於新版Espace嘅資料，新車不但擁有全新造型設計，經改良嘅車廂配搭同車架結構亦為賣點所在；今日不如一齊嚟先睹為快，睇睇呢款新版Espace有何吸引力啦！
記者：鄭達基
新版雷諾Espace嘅造型，明顯較上一代型號來得更富年輕活力感，而且重有點同廠VelSatis同Avantime嘅影子；闊大車窗能給予乘客有更佳視野範圍外，開啟幅度甚大嘅車門及低地台設計，亦方便乘客進出車廂，直立式尾燈編排亦可讓尾隨駕駛者，能清楚掌握你嘅去向。
車廂布局仍以寬敞舒適為主，空間重較前擴大不少㖭；座椅亦可按需要而收摺放平，以增加尾箱嘅載物容量。另外，車上嘅冷氣系統亦經過廠方改良，而喺車門門壁上更備有風速調校，加上出色嘅隔音效果及齊全車廂設備，同埋幾近天幕式嘅車頂設計，從而令每位乘客皆可感受到一個舒適嘅旅程享受。
一如以往，廠方亦為新版Espace提供多個引擎配搭選擇，當中包括有2.0公升直4（馬力140匹）、2.0公升直4Turbo（馬力165匹）及3.5公升V6（馬力245匹），匹配6前速手波或5前速自動波，起步加速表現同樣敏捷有勁。前輪麥花臣支柱，及後輪扭力連桿所組成嘅懸掛系統，加上經過廠方改良嘅車架結構輔助下，行車循迹性亦較前提升不少呢！