「咪話我貴啦！」
嘟嘟表現淡定顯身價

李文彪於前晚直播的《星光熠熠耀保良》上台擾攘事件中，司儀之一的鄭裕玲（嘟嘟）表現冷靜，當其他兩名司儀蔡子健和丘凱敏還未發覺有異樣時，嘟嘟已經知道出事，更推開李文彪。

「節目定要繼續」
昨日嘟嘟接受商台《茶煲裏的查篤撑》電話訪問時，談到前晚事發經過猶有餘悸地說：「佢上嚟時我哋當然好愕然，佢用嘅紙係有TVB嘅logo，啲字係print出嚟嘅。因為呢啲通常都係手寫嘅，所以我覺得唔妥，但說時遲那時快，佢已經搶咗子健個咪。於是我決定推開佢，但佢真係好大隻，推唔郁，咁我就即刻諗無論發生乜嘢事，以下節目一定要做落去，鏡頭就立即放喺我身上，咁我就即刻介紹下一個節目。當時浮喺個腦度，個職業professionalism（專業精神）就係theshowmustgoon（節目定要做落去）。」
向來自信的嘟嘟當然對自己的表現感到滿意，她笑說：「推開佢時係要保持姿態，要定啦，同要笑啦，唔可以出醜態啦。而我一落到台，第一句同監製講嘅嘢就係『唔好話我貴啦！』呢啲真係未發生過㗎，真係考吓反應囉。」

丘凱敏五體投地
蔡子健事後說：「我當時試圖阻止佢。」而丘凱敏昨日接受記者電話訪問時，對於嘟嘟在電台節目中所講大表認同，她說：「嘟嘟講得好啱，佢收得貴絕對有道理，喺嘟嘟身上我可以學到寶貴一課，佢嘅反應令到我五體投地。」