鄭秀文（Sammi）同許志安（安仔）呢對情侶離離合合，𠵱家都唔知係一齊定係分咗手，佢哋兩個前晚喺紅館演出《星光熠熠耀保良》，安仔唱完到Sammi出場，兩個着晒黑色衫，好鬼襯。完場時，安仔同Sammi重旁若無人咁雞啄唔斷係咁傾偈，難為咗企喺佢哋中間嘅彭羚！
後來企喺安仔同Sammi前面嘅鄭裕玲同觀眾講拜拜時，佢兩個重拉埋身邊嘅歌手一齊，圍埋繼續傾唔停，唔知係咪講緊李文彪衝上台件事呢？
Sammi前晚着件黑色超低胸長裙，雖然佢身形唔多出眾，但都好成熟同性感，而復出後首次演出嘅葉蒨文同彭羚都唔輸蝕，葉蒨文又係着黑色低胸長裙，不過佢身形有睇頭好多，而彭羚條黑色透視短裙都唔弱，令佢成個人青春好多，三個女歌手着衫黑鬥黑，各有各好睇。
郭富城日前喺新加坡舉辦「郭富城星加坡火辣演唱會」，城城着咗一件釘上英、美、法國旗嘅開胸無袖衫，坐住一架噴火陀螺飛碟出場，以配合演唱會火辣辣嘅主題，睇到歌迷瘋狂高呼：「你是我們的獅子王，LionKing！」城城聽到後問歌迷點解咁叫佢，歌迷就話：「你是我們獅城歌迷心目中永遠的舞台王者！」呢啲說話，睇怕係瘋狂迷戀城城嘅歌迷先會講，真係服咗佢哋。
有位經常同男歌手傳緋聞嘅女歌手，成日做到我行我素好有個性咁，但原來佢好識得冧老細。話說早幾晚有班內地同日本嘅生意人，喺銅鑼灣嘅V-Mix卡拉OK度玩，嗰位緋聞女歌手都有出現。佢陪班老細唱歌，𠱁到班老細好鬼開心，但緋聞女歌手唱唱吓又同班日本老細去咗第二度繼續開心，佢咁熱心，唔通想為將來去日本發展鋪路？
吳鎮宇前日喺機場拍攝無綫新劇《衝上雲霄》，最近有套由四大影帝，包括劉德華同梁朝偉主演嘅新片《無間道》，原來最初導演諗住搵鎮宇同劉德華合作，不過鎮宇為咗拍攝《衝》劇而度唔到期，大家即時諗到，咁咪即係梁朝偉執佢二攤？鎮宇驚自己講錯嘢，即刻話自己先至係『二攤王』。
周杰倫早前接受新城電台《娛樂一早》訪問。對於早前俾傳媒影到佢同蔡依林（圖右）出街嘅相，周杰倫話：「那一陣子我正幫蔡依林做專輯，所以我們一定會見面。」
再問𠵱家佢哋嘅關係，佢話：「你們現在還要懷疑？如果我要用緋聞作宣傳，我就不會穿短褲出去，不過我也很清楚傳媒的做法和遊戲規則。」
年輕偶像因為有麻煩，所以早幾日去咗一間律師樓搵個大狀傾偈，個大狀搵咗個女下屬去招呼佢，女下屬唔知係咪對年輕偶像冇乜好感，當佢問完年輕偶像飲啲乜時，年輕偶像話要飲可口可樂，點知佢出咗房門後，就同另外一位比佢低級嘅女助手講：「佢話要可樂喎！畀杯百事佢啫！」女下屬明知佢唔多方便飲百事，竟然咁大整蠱，唔知年輕偶像知道後會點呢？