張栢芝近日被傳與謝霆鋒復合，未知是否「愛情得意」，她昨日顯得比以前胖。對於拉姑向傳媒踢爆她愛霆鋒，她即行「奶奶政策」，三度大叫「我愛拉姑」，最後還叮囑記者在本月十九日霆鋒再為「頂包案」上庭時，不要扑傷霆鋒。
張栢芝和謝霆鋒復合，昨日她往新城時心情極靚，訪問時笑聲震天。最近謝霆鋒母親狄波拉接受傳媒訪問，對於栢芝突然瘦了感到心痛，並說假如栢芝不是愛自己的兒子而是愛自己，她定會照顧栢芝。栢芝聽後說：「哈哈哈！我惟有講句『我愛拉姑』，佢真係好可愛。我冇睇過報道，唔知講乜好﹗」問她是否愛霆鋒？她說：「法官大人我冇嘢講，我愛拉姑，佢好可愛。」當栢芝得知拉姑讚她對家人同朋友都好好時，她說：「都係嗰句啦﹗我愛拉姑，佢好可愛。」
不過栢芝昨日否認霆鋒經常帶她見拉姑，但她直認與拉姑夾得來，她說：「我人緣好，同個個都夾，唔講啦！費事又有人調亂（說話意思）嚟寫。」對於霆鋒，她仍然讚不絕口說：「佢好聰明，好厲害，好有義氣，唔可以話我哋係好好嘅朋友，不過我哋識咗五年，關係一定比較好。」
本月十九日霆鋒要為「頂包案」上庭，問栢芝要不要上庭作供，她說：「我唔會刻意逃避，當日我要返嚟錄嘢。你哋（記者）幫幫手，唔好撞得佢太犀利，唔好再用相機扑親佢個頭。」
另外，有傳栢芝的紋身，是英文字「C&N」，即Cecilia&Nicholas，她笑着說：「哈哈！平時你哋寫我乜，我都可以駁到，但係今次駁唔到，我睇番相都覺得有啲似，法官大人我冇嘢講。」問她是否默認？栢芝說：「唔係默認，又唔係承認，其實有啲嘢都係有咁啱得咁蹺。」
拉姑昨晚由泰國拜神回港，她在機場接受訪問時說：「我呢次唔係去見白龍王，總之一切順利，我有同霆鋒通電，佢心情幾好。」對於有消息指霆鋒跟張栢芝一起放假去旅行，拉姑說：「我唔識答，你哋（指記者）重知得多過我。」
採訪：王連連
攝影：羅德光