曾是48間農場餐廳嘅負責人、身家一度過億嘅陳興濤，噚日下午專程到政府總部，向特首董建華遞交《小黑魚》及《三年坡》兩本故事書，希望特首能一改過去嘅施政做法。點知政府啲人好冇人情味，氣溫逾三十度，竟然只係叫陳興濤喺門口等，令到陳興濤喺驕陽下「大汗叠細汗」，成身濕晒。雖然最後特首派警察嚟接咗兩本書，但陳興濤仍然好㷫，大罵特首對市民冷酷同埋冇禮貌！
八方見到陳興濤咁勞氣，即刻走去慰問吓佢。佢話預咗食「閉門羹」，但估都估唔到連入去接待處歎吓冷氣都唔得，所以對𠵱家政府做嘢嘅方式好不滿！陳興濤重同八方講，青少年雙失情況咁嚴重，特首唔變吓就真係唔掂，佢又話第時唔止雙失咁簡單，啲青少年可能重會出現「四不」：對人不尊重、對物不珍惜、對事不盡責、對己不盡心。
唔知時下青少年對陳興濤嘅睇法認唔認同呢？
﹙圖﹚陳興濤一心送兩本書畀阿董，點知要企喺門口等，熱到成身濕晒。
傳真︰2623-9278
電郵︰