如果今年港姐競選有個「最乞人憎佳麗」名銜，相信一定非呢位「師奶」港姐莫屬，首先，因為佢嘅所作所為唔單止乞其他佳麗憎，而且重乞記者憎，甚至乎無綫班幕後都冇乜邊幾個鍾意佢。
「師奶」港姐本身成個師奶咁款，又成日喺人哋面前讚自己靚女，話喺街上面啲人點樣眼甘甘咁望住佢，搞到啲人聽完之後即刻想衝入廁所嘔。樣衰唔係罪過，但做人始終係謙虛啲好。
最攞命嘅係「師奶」港姐自以為電力十足，每次同啲男人傾偈，總係笑口噬噬，扮到自己好有吸引力咁，但佢面對同性時，態度就完全唔同晒。重有就係「師奶」港姐成日向人展示佢啲名牌貨，但係好衰唔衰俾人發現佢原來好貪小便宜，係有乜着數都唔少得佢嗰份嘅人嚟嘅。
周杰倫日前嚟咗香港參加商台嘅籃球賽，佢球技了得相信大家都知，原來佢咁「好波」係同性格有關。噚日周杰倫接受港台《舊日的足跡》節目錄音訪問時話：「我是獨子，性格孤僻，經常獨來獨往，朋友亦比較少，所以我喜歡打籃球，因為一個人都可以打，所以我經常打籃球。」周杰倫亦講到對自己樣貌嘅睇法，佢話自己個樣其實好普通，不過就嫌唔夠高同眼太細，而最滿意嘅就係個鼻，最有自信嘅就係音樂方面，唔知大家同唔同意呢？
混血靚女早排同「細妹」個花心男友傳緋聞，事後混血靚女就梗係唔認啦，猛話同花心男友只係好朋友關係，不過有人就親眼見過佢兩個喺蘭桂坊一間酒吧攬頭攬頸，重一杯酒兩份飲，講嘢時又面貼面，混血靚女重旁若無人咁坐喺花心男友大髀度。如果咁都叫好朋友，睇怕一定有大把男人等住做混血靚女嘅好朋友。
郭可盈日前幫一個內地時裝品牌拍咗輯新廣告，佢會做一年該品牌嘅代言人。郭可盈話：「我重得到四季時裝贊助，年中慳到唔少錢。我平時都唔係成日買名牌，有啲衫重只係可以着一次，所以姐姐都受惠㗎。」郭可盈又自爆屋企收藏咗三百幾對皮鞋，新屋重特別訂做咗個新鞋櫃，朋友見佢有咁多靚鞋，重封可盈做「鞋后」㖭。
方力申（Alex）噚日去九龍城喇沙書院為「小飛魚游泳賽」任頒獎嘉賓，入選香港亞運游泳代表隊嘅飛魚Alex日前參加2002香港游泳錦標賽，重攞咗一百米背泳金牌，雖然外界曾經質疑過Alex入選亞運泳隊嘅資格，不過Alex話人哋咁諗都好正常，因為自己確實係好耐冇練水。