霍大班講笑有一手 - 李八方

  霍大班講笑有一手 - 李八方

星期日放假,但和黃霍建寧大班(圖)打完波都要返工,無辦法。事關合和胡應湘為港珠澳大橋護航,批評長和系及其主席李嘉誠,令到霍大班星期日都要開記者會。
霍建寧數口精,估唔到講笑都有一手。話說佢發表完關於建橋的意見後,記者問佢點睇本地固定網絡市場,同電盈如何競爭?係人都知電盈主席李澤楷係佢老細嘅二少,條問題唔易答。但大班就話,佢哋係上市公司,我哋又係上市公司,各有各做,大家都唔知對方點做。
佢重話有啲雜誌講到佢哋兩人好老友,一齊去滑雪,但照佢所知,李澤楷邊度識滑雪啫,滑雪呢家嘢須好似我哋(霍建寧)呢啲人至掂嘅。
正當記者信以為真嗰陣,霍大班突然話係講笑,自己都未同「小小超」去過滑雪。佢話,查實自己都唔知李澤楷識唔識滑雪,而自己又「邊有咁好彩」,可以同佢一齊滑雪呢。


傳真︰2623-9278
電郵︰[email protected]