噚日我哋《蘋果》嘅體育版，頭版堅尼揸住個烏鴉頭骨、碌大對眼嗰個兇神惡煞樣，有冇嚇親大家呢？其實體育版決定用呢張大頭相並唔係想嚇人，只係想表達出堅尼嗰種桀驁不馴嘅狂人性格啫。
不過堅尼呢種「狂」，其實唔係個個都覺得可怕，相反最近重成為好多人嘅話題，愈來愈受歡迎咁喎！
前曼聯後衞史譚，就借堅尼最近嘅自傳風波，講番當年佢又係出自傳，結果就畀人賣走，怒斥費格遜大細超。
至於上周末愛爾蘭輸波，領隊麥卡菲賽後就有啲酸溜溜咁，話唔敢否認堅尼以前在陣嘅作用性。咁都可以講起堅尼，唔怪得一直贊助緊堅尼嘅運動品牌Diadora，最近就準備再同呢位曼聯隊長續多三年贊助合約，可以話愈畀人鬧，愈紅！
拉素今季又賣走兩件主將套現後，即時見連鎖反應，暫時只賣得出兩萬幾張季票。眼見米蘭雙雄已經賣出六萬幾張，相信拉素高層真係一殼眼淚。教練文仙尼重慘，話希望轉會市場快啲關閉，怕又有主將俾人撬走，真係可憐。
荷蘭「鬥牛㹴」戴維斯想由祖雲達斯過檔羅馬，可謂街知巷聞；而佢都好識把握機會省靚招牌，響上個禮拜六對白俄羅斯又省入一粒，已經連續兩場國際賽有波入。羅馬前鋒巴迪斯圖達日前爆料話知道戴維斯一定成為佢隊友，就唔知堅定流嘞。
上周國際賽賽期，西班牙冠軍華倫西亞就趁呢段空檔搵銀，搭長途機飛咗嚟中國，準備周中同甲A球隊四川大河踢表演賽。雖然呢場波華倫西亞會有十萬鎊落袋，不過家陣西甲開咗咧，咁遠水路走嚟踢場無謂波，重要幾乎精銳盡出，雖然佢哋呢個禮拜聯賽對手只係升班馬維爾瓦啫，但都唔好咁輕敵喎！
巫師最近喺《華盛頓郵報》登咗一則新賽季售票廣告，上面大大隻字話：「一齊嚟睇佐敦、咸美頓同迪克遜打波吧！」點知事後巫師嘅發言人竟然話，唔能夠保證佐敦肯定番嚟打波。嘩！咁樣咪分明係欺騙球迷，如果矇查查買咗成季套票，佐敦又話要退休嘅話，到時真係喊都無謂囉！