中大前校長高錕功成身退之後，一時做吓資訊科技公司顧問，一時搞吓數碼港一條龍小學，又寄情藝術，玩埋陶瓷。
八方上周喺張瑪莉嘅影展遇見高校長，少不免問佢點睇早排嘅中大淫賤迎新營風波。點知高校長一臉茫然，反問八方發生乜事。
據知，高校長最近並無離開過香港，睇嚟佢真係逍遙自在、不問世事，連呢次上晒各大報頭條嘅中大新聞都冇留意。不過唔知反而可能係好事，至少唔使「痛心疾首」。
八方當時本想簡述事件畀佢知，講到口邊，發覺啲不文口號好難對校長啟齒，就算講咗佢都未必明，惟有請佢睇返舊報紙。
高校長話，自己以前好少去大學嘅迎新營，但都知有啲學生幾不負責任。
佢又重提以前做中大校長時，曾經俾學生搶咪抗議一事，睇嚟仍然耿耿於懷。
八方覺得當年關心校政學生搶咪係一腔熱血，但今次嘅「新亞桑拿」就係一腔下流，校長若然見到，怕且會激到嘔血。
（圖）中大前校長高錕往張瑪莉影展捧場，原來兩人已是十多年的老朋友。
傳真︰2623-9278
電郵︰