曾經坐擁逾億身家嘅農場餐廳創辦人陳興濤，破產之後銷聲匿迹一段時間，噚日又再露面。出席專門照顧末期癌症病人的白普理寧養中心十周年慶典，大講其發達、破產感受，重勸破產港人要努力增值，得閒進修一吓，但在場幾十人好似冇乜反應。八方見陳興濤好精神，重話兩年半後可脫離破產行列而感到好開心。
陳興濤講，香港人心態喺「功名身外物，銀包定心丸」，但佢話，唔係一定有錢至開心。佢話自己破咗產後一家五口生活得好開心，並叫破產人士申請綜援，跟住再去進修，學業有成後可以回贈社會。
講完一輪開心嘢之後，陳興濤向八方投訴，話董建華嘅三司十一局，無一個部門負責香港人唔開心嘅問題。陳興濤話，今日會去政府總部叫董建華請食飯，但唔喺白食佢。陳興濤會送番兩本書畀阿董。嗰兩本書一本叫《三年坡》，產自南韓；另一本就係美國出品嘅《Swimmy》，中文譯做《小黑魚》。呢兩本書都係教人走出困局、勉勵人唔好灰心嘅勵志書籍。希望董伯伯睇完後，可以帶住我哋走出困局咁就好嘞。
（圖）陳興濤自稱兩年半後可脫離破產行列。
傳真︰2623-9278
電郵︰