昨日講「逸夫」書院學生迎新，搞到新亞書院學生形象受損。其實中大搬入馬料水之後，書院氣氛逐年薄弱，學生揀邊一間書院，好多時都MCC，兼且唔同學科嘅學生分別在不同地方上堂，以前（即係許冠文畢業前後）嗰啲強烈書院精神，已經冇咗八八九九，逸夫生、新亞生、崇基生、聯合生等等，喺社會大眾睇嚟，完全冇分別，你話某書院學生出醜，整個中大都蒙羞，外間人邊度分得出逸夫生搞「新亞桑拿」，而唔係新亞生搞新亞桑拿吖。
讀者測量Ｔ話佢位千金在中大商學院畢業，印第安納大學攞MBA，現於美國工作，年薪好唔錯，測量Ｔ話佢個女及班同學，個個品學兼優，所以對中大有好感，愛之深就恨之切，測量Ｔ來函話：「不容中大現在學生胡作非為，請你努力將這些壞蛋入罪，並要領導人負責清理門戶……」嘩，測量Ｔ雖係一位「中大校友之父」，唔需要咁勞氣嘅，大人有大量，十九歲學生都係細路啫，當佢哋玩大咗就算喇。
一位讀者要求左丁山表個態，茲表態如下：大學生公開公然講淫賤骨精強肥龍式俗語，有失學生身份，抵鬧之至；不過鬧完記過就算，唔使「壞蛋入罪，清理門戶」咁緊張，全世界大學生都有犯錯（唔係犯罪）嘅特權，最緊要錯而能改，以後學乖一啲。至於有損校譽咯喎，哈佛都有乞兒，有自信心嘅大學，會相信學生只係一時貪玩，佢哋基本上係叻仔叻女識得自我調整嘅。