現今玩具界中，積木嘅主導地位絕對毋庸置疑，由老字號LEGO到至Hit嘅KUBRICK、BE@RBRICK都一樣大賣特賣。眼見咁好嘅形勢，嚟自加拿大嘅MEGABLOKS都率領旗下嘅PROBUILDER積木到港，主打精細像真，當中至巴閉係攞正Licence生產嘅兩架Harley-Davidson電單車積木，由死氣喉、頭燈，以至長叉都做到好似真車一樣，連Harley迷都大叫好嘢！
記者：張穎倫 攝影：陳盛臣
今次出嘅Harley積木，分別係Saftail同RoadKing兩款不同型號，但唔少Harley迷見到呢兩架車，都被紅、藍、黑三色組成嘅Saftail深深吸引。好似身為「ChopperUnion」電單車會中堅嘅阿Rick話，「一睇就知佢係Harley，事關佢做油缸比例做得好似，表版亦特別細緻，比以前出嘅電單車積木靚好多，質素拍得住Diecast金屬模型，啱晒想一手一腳砌架Harley嘅朋友。」
阿Rick話車頭嘅造功最抵讚，唔單止頭Fork做到長叉嘅神韻，指揮燈同倒後鏡更做到真嘅一樣，「雖然係以塑膠製造，但電鍍嘅顏色絕對幾可亂真，抵讚！」
「呢架Saftail同另外部RoadKing本來都不相伯仲，但Saftail連車尾兩邊嘅皮袋都做埋，就明顯更勝一籌。如果遲啲出埋其他皮袋，可以更換上去的話，就可以享受埋改車嘅樂趣。」
同樣都係ChopperUnion電單車會會員嘅Dickson就話，見到呢架積木時覺得好感動！事關好開心有人攞正Licence做Harley積木，用積木做Harley可以發揮改裝嘅創意，現成車主可以用嚟做Dummy，先改積木，再改真車。買唔起或者考唔到牌嘅一樣過到車主癮、改車癮，完全發揮Harley「It'smystyle嘅精神！」
雖然RoadKing冇Saftail做得咁正，但由於RoadKing喺香港都有唔少捧場客，所以亦不容忽視。藍色嘅車身除咗充份發揮巡航車嘅線條美外，至正係腳踏同油缸都做得極之精巧，油缸上嘅「Harley-Davidson」字樣比例完全冇走樣，唔似翻版嘢求其寫個字就算。可以將整個油缸逐少砌出嚟，絕對可以滿足一眾積木迷和電單車迷。
初到香港嘅MEGABLOKS查實係全加拿大最大嘅玩具製造商，由1967年創立至今一直主打建築系列嘅積木玩具，由起重機、鏟泥車等產品嘅積木都應有盡有，更攞過美加Parents'Choice、Dr.Toy、OppenheimToyPortfolio等玩具獎項。近年開始拓展國際市場，加推軍事、汽車等不同系列嘅積木，希望爭取小朋友玩家之餘，亦可以吸引成年人收藏，可以話係集合LEGO同KUBRICK嘅方向於一身。
如果你對電單車冇興趣的話，呢艘潛艇積木就一定能討好男孩子同軍事迷嘅歡心。皆因佢完全依照美軍俄亥俄級核動力海狼潛艇製造，只要3粒AA電就可以發出警號、魚雷、求救嘅聲音同燈光，絕對夠晒氣勢。再加上，佢採用半開放式設計，令你可以睇清睇楚潛艇上各個船艙，非常逼真。
相信大家都冇乜機會參觀真嘅美軍核動力潛艇，但呢套積木就將指揮室、武器庫、核反應堆每個部份活現眼前，更可逐個船艙拉出參觀，滿足你嘅好奇心。
絕對唔可以睇小，雖然上面嘅電單車做得夠精細，絕對可以吸引大朋友買嚟珍藏，但論到反應激烈，就未必及得上小朋友最鍾意嘅新到《飛天小女警》積木啦！每Set兩隻夠晒生鬼之餘，碰啱佢嘅大電影又上映緊，小朋友又點可以抵擋花花、泡泡同毛毛嘅魅力。
每Set售價：$69（鴻興玩具）
身為隊長嘅花花拍住爸爸教授一齊出場，壞人怕怕，但小朋友就最鍾意。唔單止係花花身為小女警嘅隊長，而且佢嘅蝴蝶結亦比泡泡同毛毛更搶眼，再加埋表情儍更更嘅教授，問你點頂？
電影中泡泡憑住「小苦妹」把聲同成日喊嘅本領，雖然好得意，但就俾成日話自己最聰明嘅大奸角馬騮阿祖搶晒鏡。講番積木都係馬騮阿祖稍勝一籌，事關佢嘅面相做得夠Cool夠奸，手腕關節更可轉動，比泡泡擺出更多Pose。
小女警中最大脾氣嘅毛毛對住新奸角Him，確實非常危險。皆因Him比馬騮阿祖有更多詭計，而且連積木都比毛毛落色更多，表情手工明顯更精細，相比簡簡單單嘅毛毛就危險得多。
精思（31015033）
尖沙嘴廣東道5號海洋中心商場347號舖
JCShop（31022783）
銅鑼灣時代廣場833號舖
鴻興玩具（28914739）
灣仔太源街19號C舖