馬會前主席李福深娶新抱，細仔李國安（英文名Sean）同結識四年嘅AmyOriana，上個禮拜五喺紅棉道註冊；噚晚假君悅筵開二十一席，大宴親朋。一對新人五點鐘喺君悅嘅總統套房，由神父Rev.JohnChynchen主婚。
講番一對新人嘅背景，新郎哥李國安𠵱家喺香港賽馬會工作，主要負責發展賽馬跑道同多元化宣傳系統；新娘子就從事房地產工作。兩人九七年尾喺波士頓認識，最大嘅共同嗜好就係騎馬，忙完婚禮後會飛去法國度蜜月。
噚晚嘅婚宴相當盛大，二十一席西式佳餚，場地布置到好似花園咁，充滿歐陸風情。八方八到，李家為咗噚晚盛會，早喺半年前已經着手籌備，嗰啲雲石柱同埋鮮花，都係喺歐洲專程訂返嚟。而為咗配合噚晚嘅主題「RomanticNight」，新娘子除咗着婚紗外，重着咗兩套米色晚裝。
噚晚到賀嘅有好多馬圈中人，例如馬會行政總裁黃至剛、練馬師告東尼夫婦同李格力夫婦等；政務司司長曾蔭權亦有嚟飲。噚晚嗰二十一枱全部以花名命名，阿權重坐喺「洋紫荊」嗰枱㖭。
傳真︰2623-9278
電郵︰