美伊戰事一觸即發，上禮拜五美股反而大升。以往好多次，凡有戰事，股市不跌反升，理由係股市驚打仗，但到咗真係打之時，代表「場仗就快打完」，股市少咗不利因素。港股9600邊邊，暫時考驗成功，借住美股反彈，都會做番好啲，Call輪會有啲作為。
中銀（2388）上禮拜五收8.25元，一個禮拜就唔見15仙。兩件熱門Call輪，9456一個禮拜散28%，9458散26%。兩隻輪同係明年2月夠鐘，市價差唔多，溢價同槓桿率亦幾乎一樣，值得諗吓博反彈。
中移動（941）同聯通（762）都已派半年成績表，前者半年多賺10%，後者多賺3%，前者股價近期走勢較弱，後者較強。中移動過去5日冇咗1.35元，喺20元邊邊搵到支持，細注博相關Call輪諗得過，對象係9405。上禮拜五中移動單日跌15仙，9405則升3%，收9.7仙，係預先見底迹象。隻輪明年1月到期，溢價19%，槓桿率20.8倍。
聯通成績比預期靚，上禮拜五跑贏大市，估計會繼續硬淨，搵啲聯通Call輪短炒無妨，對象係最長命嘅9383，明年9月夠鐘，溢價20%，槓桿率7.1%。
章 盛