現年十九歲的余文樂與盧巧音分手後，多番遭舊愛明窒暗寸，一直沒有反擊的他，自言是發揮男人應有的風度，不想潑婦罵街。而近日被傳藉謝霆鋒小休乘機上位的他，表示只視對方作師兄，並坦言從未與霆鋒傾過偈。
近日余文樂（樂仔）與陳冠希（Edison）的不和傳聞正鬧得熱烘烘，先傳出樂仔不滿Edison指他難以取代謝霆鋒，繼而又指樂仔拉攏周杰倫杯葛Edison，對於種種傳言，樂仔只說：「我之前都冇見過Edison，做乜要黑佢面啫？」
但觀乎Edison近日擺出的態度及言論，似對樂仔頗有敵意，樂仔說：「可能係記者追訪得緊要，令佢有啲唔開心，有時講嘢會中間夾雜好多嘢，令大家有誤會。總之我係冇嘢，我會做好自己，唔會因為呢啲傳聞而影響自己嘅心情。
「其實我同Edison從來冇拗撬，我只希望做每件事開心愉快，我亦都希望啲人唔好冤枉佢。」
至於有傳謝霆鋒因樂仔乘他暫時退出娛樂圈而攝位取而代之，故對樂仔有心病一事，樂仔說：「我同霆鋒都未有機會講過嘢，我相信都係一個誤會，啲人傳話我係佢接班人啫，但我唔可以同佢比，自己差太遠點比較吖？佢係師兄，佢做到𠵱家呢個位，都要付出，而且每個人嘅風格都唔同。」
而與樂仔同屬環球的麥浚龍（Juno），早前亦有傳二人曾爭寵，樂仔卻說：「我同Juno真係冇嘢，大家係朋友，佢好勤力，我欣賞佢㗎。」
其實作為新人，余文樂出道至今可算一帆風順，身邊有許多伯樂，支持他的fans也不少，令他成為今年一致看好的新人王。樂仔卻說：「多謝先啦，但未到最後一刻，都冇人知結果係點，今年嘅新人表現得都唔錯，個個都有機會，我只係其中一個，並唔係乜嘢新人王。」
撰文：朱芷瑩
攝影：黃文成