現今貴為司長夫人嘅伏明霞係跳水皇后，係人都知，佢嘅十米高台跳水姿勢迷倒千萬人，但原來佢第一次從十米高台跳落去，全憑一股拚死精神。
大陸網站報道，前日喺霞女家鄉武漢有個教師節活動，原本想請霞女同埋一班武漢出產嘅體育世界冠軍人馬參加，但霞女掛住喺香港陪老公冇出席。結果請咗佢嘅小學同班同學、跳水世界冠軍蕭海亮同埋班主任宋德芳老師。已退休嘅宋老師話，記得呢兩個世界冠軍學生，因為佢哋經常訓練缺課，要同佢哋補課，小伏細個時唔鍾意講嘢，但好用功。
宋老師回憶十七年前，伏明霞同蕭海亮第一次訓練跳十米高台，兩人唔敢跳，於是佢就對佢哋講，要有董存瑞精神，千祈唔好驚咁話。呢位董生係乜水呢？佢喺國共內戰時，為咗要炸國軍堡壘，一手托住炸藥包，跟手一拉引線，咁就成為烈士。不過，八方唔多明，跳水同托炸藥有邊一點相似？
﹙圖﹚宋德芳（後排者）珍藏伏明霞（前排右一）及蕭海亮（前排中）的舊相。
傳真︰2623-9278
電郵︰