李龍基縱橫咗樂壇咁多年，前晚終於喺灣仔伊館開處男演唱會，馮仁昭一向鍾意聽吓啲舊歌，所以前晚都去咗捧佢場。
李龍基嘅歌藝就一向都有水準，當晚佢都唱咗唔少七十年代嘅中英文經典名歌，又扮鬼扮馬，連收買佬都扮埋，認真落力。
久別多時嘅威利同李龍基係老友，所以前晚佢都有上台唱歌，而李龍基嘅契仔蔡子健都有去捧場，前晚全場差唔多爆滿，雖然座上客都係成年人居多，但現場觀眾都好熱情，李龍基唱完最後一首歌之後，台下嘅觀眾即時不斷叫安哥，反應熱烈。
今次基哥嘅演唱會係由榮華餅家贊助，所以佢都好識做，喺台上開玩笑話自己係老餅。而完騷後李龍基話：「今次開兩場個唱，反應唔錯，我又得到六位數字酬金，都算唔錯。」
李龍基其後重搞笑咁話：「因為謝霆鋒退出，我先至開演唱會咋！」
英皇3T小花Yumiko（鄭希怡）、Maggie（劉思惠）同Mandy（蔣雅文）噚日下晝連趕兩場，首先出席《J.B.Yamano&Nao秋日化妝及髮型SHOW》，然後又要趕去《Neway聯fan所英皇處女生日Party》。
三個處女座壽星女同過百位fans一齊玩遊戲慶祝生日，三個小花都有自己嘅擁躉支持，原本真係勢均力敵，不過後來突然殺出個久違咗嘅超級Mandyfans「蜥蜴仔」，重送咗大堆禮物畀Mandy，「蜥蜴仔」上到台即刻全場起哄，叫佢咀Mandy，連Yumiko都大嗌「咀佢」，嚇到Mandy即刻伸隻腳踢Yumiko，好彩「蜥蜴仔」最終冇飛擒大咬咋！
無記有個住家小生早排因拍劇搭上咗生電皇后，幾乎係男星同佢合作都俾佢電親，不過當小生想為佢而離婚之際，生電皇后居然又同另一套劇嘅小生有路，所以住家小生即時為離婚一事而三思。不過佢同老婆感情本身都出現好大問題，就算冇第三者出現，佢兩夫婦嘅感情都係麻麻，之不過為咗前途，住家小生都冇諗過會離婚，所以生電皇后成為過去之後，住家小生已經打消離婚念頭。
應屆港姐林敏俐、左慧琪、胡家惠、嘉碧儀同埋蔡潔雯等，呢幾日喺泰國進行親善訪問，記者就發覺季軍胡家惠嘅英文程度，比較其他佳麗遜色，佢嚟嚟去去只會講「Thankyou」、「Nicetomeetyou」呢兩句！不過胡家惠就力撐咁話：「雖然我中七畢業，但我啲英文唔會遜色過其他佳麗，最重要係溝通得到，如果英文真係差嘅話，公司都唔會安排我去選國際小姐啦。」奉勸胡家惠想做智慧與美貌並重嘅港姐，應該要努力惡補吓。
盧敏儀噚日喺老公孫敬安同家人嘅陪同下，去咗金鐘高等法院申請做執業大律師。盧敏儀着住整齊嘅律師袍到場，英姿颯颯，由於佢好快就完成所有手續，所以重同家人喺高院門外任記者影相㖭。不過盧敏儀為顧及自己律師嘅身份，唔方便做宣傳，所以婉拒訪問。但盧敏儀老公孫敬安就話：「敏儀後日（九日）會去英國進修一年，到時我會陪佢三星期。」經過幾年嘅努力，盧敏儀終於取得成績，認真值得恭喜。
黃伊汶（Dior）噚日去到荷里活廣場同余文樂一齊義賣月餅，雖然在場嘅市民反應唔係好熱烈，不過Dior嘅歌迷就好識做，佢哋為咗支持自己偶像，都即刻排隊買月餅。Dior話近來參與好多呢類活動，所以啲fans都同佢呻窮喎。
有位神經質女藝人，早排搭上一個有婦之夫，雖然有人提醒過呢位女藝人唔好咁認真，以免繼上次失戀之後，再受傷多一次，但女藝人唔肯聽人講，結果喺最近搞到分手收場。
不過，聽講佢哋分手原因，係因為女藝人對之前位男友重念念不忙，好似將有婦之夫當係愛的替身，人哋發覺咗之後，梗係即刻走夾唔唞啦。