經濟不景，搵餐晏仔養自己都夠晒艱難，世上竟有1位龍貓癡，對待12隻龍貓就如自己親生孩兒。新居入伙，不但預留海景睡房，重親自設計獨立居停，好讓牠們住得舒適，每天執屎梳毛任勞任怨，看得小記心生羨慕，不禁歎句：「做龍貓好過做人！」今次小記就請嚟龍貓癡Jester，細訴他對龍貓的段段感情及難忘經歷。
記者：張穎倫
攝影：周旭文、陳智良
其實大部份龍貓，無論大種定細種嘅價錢都差唔多，反而係以顏色去衡量價錢。最貴嘅粉白色平均都去到$3,800一隻，其次係銀白色，每隻都要$3,000，平平哋想試吓養就不妨選擇約$1,000嘅灰色龍貓。
龍貓癡Jester
7年前喺電視上見到呢款小動物，就對佢哋一見鍾情，不過當時六千幾元先有一隻，身為學生嘅我實在負擔唔起。直到5年前，先有能力購買第一隻龍貓––夫仔，相處後發覺佢哋雖然冇貓狗咁聽話，但企喺度傻吓傻吓，隨時隨地又啪一聲撻低瞓覺，真係非常過癮，所以就情難自控愈養愈多隻！
養龍貓養咗咁多年，最難忘係蓉蓉過身後，佢老公夫仔心神恍惚，只係自己瑟縮一角，當時佢瘦到見骨，後來有朋友提議幫佢搵第二個老婆。於是我就帶埋夫仔去舖頭揀對象，行咗個幾禮拜，佢見過幾十隻龍貓女都冇Feeling。直至佢見到草草先有啲反應，慢慢培養咗幾日感情，先決定帶埋草草返屋企做佢第二任太太，之後佢先肯食多啲嘢！從呢件事開始，我知道龍貓都係性情中人，而且對夫妻之情，隨時睇得重過父子情㖭！
佢哋係紫灰B同金仔所生嘅兩隻小寶寶，到𠵱家都係得3個星期大，重未幫佢哋改名。龍貓仔出世時好得意，唔需要搵人幫手接生，媽咪會襯住凌晨時候分娩，全程約需1小時左右。佢哋出世前都毫無動靜，第二朝起身返工先發現多咗2隻小龍貓，嗰時開心到不停笑！
係咁多隻龍貓之中，我最錫扁扁，因為佢出身自單親家庭，4年前啱啱出世一個月，佢媽媽蓉蓉就死咗。龍貓仔通常都要媽咪餵2個月先可以戒奶，捱唔過呢個餵哺期就好有可能養唔大。所以我就日日夜夜抱住佢，一日兩餐慢慢餵佢飲奶，辛辛苦苦堅持咗六十幾日，好彩最後都無事，感覺就好似自己個仔患咗重病，終於吉人天相一樣咁開心！
𠵱家住緊呢間屋入伙啱啱一個月，裝修時已預咗一間房畀12隻寶貝龍貓住，裝修時親自設計咗一套木櫃，用咗差唔多$16,000，分別有12個獨立房間，重有埋玻璃門，放工返到屋企見到佢哋就好似見到仔女咁開心。
由於龍貓慣咗喺寒冷嘅地方生活，所以我特登裝咗部冷氣畀佢哋，而且24小時都Keep住喺攝氏18度，每月冷氣費要成$1,000，不過都唔會肉赤，最緊要佢哋住得開心！而每個房間都設有獨立水壺、食物兜同私人洗手間，更附設獨立轉輪，俾佢哋得閒跑吓步Keep吓Fit。
龍貓糞便比較多，清潔少一日都唔掂，所以每日都要幫佢哋打掃兼換木糠，重要同佢哋玩同梳毛沖涼，每晚返到屋企至少要用2個鐘服侍佢哋，有時真係覺得好攰！
初初餵佢哋食Alfaalfa嘅草，由於蛋白質太多，好容易令佢哋肚屙。後來上網搵資料，發現美國𠵱家好興餵龍貓食呢隻最新嘅Timothy草，佢纖維較高，令佢哋少咗肚屙，亦活躍咗，最啱做佢哋嘅早餐；晚餐就會畀佢哋食Mazuri作為主糧。
一般龍貓都鍾意食菠蘿乾、木瓜乾做零食，不過每星期食多過3粒就隨時會肚屙。所以我選擇用麥餅同墨魚骨做零食，貪佢高纖之餘，又可以令佢哋啲牙更健康！
每包售價：$12
之前紫灰B生完BB，身體比較虛弱，所以我就搵咗呢支nutri-cal營養膏幫佢產後進補。我每隔3、4日就會餵佢食營養膏，之後就明顯見佢精神好番好多。呢支營養膏有齊龍貓所需要嘅各種營養，普通龍貓仔平時都可以食，包保肥肥白白。
售價：$98
售賣點
寵物蛋（23323123）
油麻地現時點商場2樓242號舖