繼昨日為大家介紹咗，一系列將於法國巴黎車展上所展出嘅新車後，今日再帶來兩部同樣屬於車展會場上嘅展品、但性格截然不同嘅車款，一部係以高性能跑車形象出現嘅萬事得Mazda6MPSConcept，以及標緻H2O概念消防車。
先講講萬事得Mazda6MPSConcept，外形與現有Mazda6相近，但就裝有全車包圍、全新鬼面罩及18吋跑車合金胎軨等裝備，再襯以全新SilverStorm車身色調，一陣陣跑車辛辣味由此而生。車廂布局亦有新配搭，座椅會以真皮鑲嵌而成，並以黑白兩色作配襯，望落明顯較現有Mazda6來得更具吸引力。然而，Mazda6MPSConcept會以一台2.3公升MZRTurbo偈作動力核心，馬力輸出為280匹，性能表現突出之餘；匹配一套跑車懸掛及四驅系統，更可增強車子嘅操控性㖭。
至於另一部標緻H2O概念消防車就重厲害，佢不單止係一部未來消防車，先進嘅車廂配備，更係其過人之處㖭；H2O概念消防車除外形夠突出之餘，鮮紅色車身、車頂閃燈、車頂鋼梯及18吋輪胎組合，都令人一望而知其身份。車廂雖然只能容納兩名乘客，但就有齊GPS、無線電話等先進裝備，以便進行拯救工作。另外，此車更以一套環保嘅燃料電池作動力來源，不但可有助減低污染外，而且重可以供應電力予其他拯救工具，方便進行拯救工作㖭。