喺911事件一周年前，美股跌極重有，雖然好多高官都出嚟吹風話美國經濟唔會出現雙底衰退，但睇到公布咗嘅數據重係麻麻，所以個市就好似食咗瀉藥咁，瀉完無耐又再瀉過，啲投資者見到低位都唔敢入市去撈。
講開個市下瀉，伏勝就諗到隻專做「排毒美顏寶」嘅新股龍發製藥（2898），呢家公司早幾年真係威到盡，個勢一時無兩，皆因當時香港啱啱吹緊收身風，伏勝當年亦有好幾個好友用咗之後，個人真係收晒身，喺一傳十，十傳百下，龍發當時真係賺到豬籠入水。不過今時唔同往日，市場上太多同類產品，再加埋用啲靚女明星作招徠嘅健美中心大行其道，美顏寶再唔係獨領風騷。
有個做包銷行嘅行家同伏勝講，今次隻股喺淡市中圍得晒飛已經好好彩，由於隻股喺上市嘅時候，有九成股份係配售畀啲「獨立第三者」，呢批人聽講都係望喺上市日贏兩成就走人，但隻股仔喺上升後最多都係做過三毫八，同預期差一大截，其中有幾個批咗股嘅客同啲經紀講，話如果隻股再唔郁就要沽股「骨水」，如果係真嘅，隻股真係好難有睇頭。
電盈（008）喺上星期四公布半年業績，自從隻股跌穿咗兩蚊之後，已經唔多人理會呢隻股，業績公布又輸咗成7億幾，有人估隻股好快就會成為毫字股。但上星期五早段，隻股不跌反升，有炒家即刻話要睇實，皆因出邊傳緊隻股會合股，如果要合股嘅話，就一定會先炒番起佢，據講所定嘅目標價更直指1.60元。但睇番隻股星期五個勢重未有鑊氣，炒唔炒得起真係要睇吓佢哋嘅功力。
伏勝