余文樂與盧巧音的一段姊弟戀結束後，女方除表示要日沖三次涼治療情傷外，亦曾多番揶揄舊愛，樂仔說：「件事係啱同錯我都唔想再講，總之件事完咗，大人大姐就唔好再提，做男人要有風度，唔想潑婦罵街咁，好肉酸㗎。」
不過，樂仔卻自言這段為期八個月的姊弟戀，教會了他一些事情，樂仔說：「我大個咗，識得點去面對傳媒嘅壓力。但點都好，我會尊重佢（盧巧音），始終大家都曾經一齊過。」
除盧巧音這位已成過去式的女朋友外，入行只有短短一年時間的樂仔，緋聞也十分精采，先後與台灣女星楊丞琳、Twins的蔡卓妍（阿Sa）及英皇3T小花蔣雅文（Mandy）的名字扯上關係。
樂仔語帶無奈地說：「冇辦法㗎，我自己冇做過咪得囉，到𠵱家都冇人影到嘢，只不過係有啲傳媒覺得啫。有啲人第一眼就係判定你有問題，希望將來可以從我工作上嘅表現，令人哋改觀。」
自言擔心遭外間誤會他是花心蘿蔔的樂仔，曾為此而深感困擾，他說：「初頭我係唔開心，但呢啲係我唔能夠控制嘅事，𠵱家我對呢啲事會笑笑口，其實都係唔開心㗎！惟有選擇唔講好過，我唔想愈描愈黑。我拍親嘅戲，逢係有女仔就傳，好似傳開有條癮，真係激死！」
後記：
相約余文樂訪問當天，我們到了添馬艦的「玩轉夏日嘉年華」拍照，樂仔在酷熱警告下先後試玩碰碰車、吊威吔、爬繩梯……雖然辛苦，但他似乎也玩得十分快樂。
不過，日前遊樂場卻突然結業，樂仔對此只能無奈地說：「影呢輯相就當係留念囉！」