元朗大榮華嘅老闆韜哥（梁文韜）自從得咗個「食神」稱號後，威名遠播，搞到海外各方「食神」都紛紛來港，以食會友。上個禮拜四就有位大馬食神施社帝專門嚟踩場，點名要試吓香港食神嘅手勢。
呢位大馬食神喺馬來西亞開咗間「隆盛佛跳牆大酒店」，同韜哥一樣成日鍾意帶啲識飲識食嘅人到處嘗鮮。今次施社帝就帶咗一行四十人，先去咗廣東三日，食盡南番順特色美食，連娃娃魚都試過，再踩入香港，一過海關就直闖元朗大榮華。
香港有名「美食天堂」點可以失威畀廣東？韜哥當然唔敢怠慢，親自上陣炮製番一圍「特首宴」，畀大馬來客品嘗。乜嘢係「特首宴」？原來就係董特首幾次去大榮華食過嘅菜式，但食乜嘢咁巴閉？韜哥話，唔係鮑參翅肚，又冇山珍海錯，而係充滿風味嘅圍村菜，例如缽仔絲苗飯、蒸黃油烏頭、「炒長遠」（炒粉絲）等。兩大食神過招，最後結果點樣？八方聽講，大馬食神食完之後話好開心，重話返大馬之後會寫番本書講香港飲食㖭。
傳真︰2623-9278
電郵︰